Ruminiyalik lo‘lilar oilasi Ispaniyadagi restoranda nikoh to‘yini nishonladi va qochib ketdi. Bu haqda “RIA Novosti” xabar berdi.
Marosim Ispaniyaning Vivero munisipialitetidagi restoranlardan birida bo‘lib o‘tgan. Unga 200 nafar mehmon taklif qilingan, shuningdek, marosimda ruminiyalik qo‘shiqchi Nikolaye Gutse qo‘shiq kuylagan.
Bayramdan oldin oila tantanani o‘tkazish bo‘yicha shartnomani imzolagan va 1,5 ming yevro garov puli qoldirgan. Biroq ertasi kuni marosimdan so‘ng restoran xo‘jayini mijozlarni topa olmagan. Buyurtmachilar tomonidan qoldirilgan telefonlar ishlamagan. Tadbir uchun to‘lanmagan hisob sakkiz ming yevrodan ko‘proqni tashkil qilgan.
Keyinroq tadbir qatnashchilaridan biri — kuyov akasining xotinini topishga muvaffaq bo‘lingan. U eri avariyaga uchraganini, keyin esa pul uchun Ruminiyaga ketganini aytgan.
Restoran egasi politsiyaga murojaat qilgan. Aniqlanishicha, oila ancha vaqtdan buyon Viveroda yashagan, biroq oilaning daromad manbalari yoki ro‘yxatdan o‘tgan yashash joyi haqida ma’lumot topilmagan. Politsiyachilar Ruminiya rasmiylariga yordam so‘rab murojaat qilgan. Vijdonsiz mijozlarning o‘z vataniga ketib qolgani taxmin qilinmoqda.
Izoh (0)