Toshkentning Qo‘yliq bozori atrofidagi tirbandliklarga barham beriladi

Toshkentning Qo‘yliq bozori atrofidagi muntazam tirbandliklarga yoz o‘rtalariga kelib barham beriladi. Bu haqda Sputnik xabar bermoqda.

Iyun—iyul oylarida bu yerda poytaxtdagi eng yirik ko‘ngilochar-savdo markazlaridan biri hamda yaqinda loyihalashtirilgan va qisman qurib bitkazilgan “yo‘l cho‘ntagi”ning foydalanishga topshirilishi rejalashtirilmoqda.

— “Elektroapparat” tarafdan “Farg‘ona yo‘li” ko‘chasi bo‘ylab Qo‘yliq bozori tomonga yurilsa, ko‘prikka yetmasdan asosiy trassaga chiqiladigan kichik “cho‘ntak” bo‘ladi. Hozirda bu yerda yo‘l chetida turgan mashinalar sababli muntazam ravishda tirbandliklar paydo bo‘lmoqda. Savdo majmuasi ishga tushganidan so‘ng bu yerda keng “cho‘ntak” bo‘ladi. Yo‘lovchilarga qulay bo‘lishi uchun avtobuslarga maxsus kirish qismi bo‘lgan bekatlar quriladi, buning uchun 22 sotix yer ajratildi”, — dedi Bektemir tuman hokimligidagi manba.

Shuningdek, markaz yonida zamonaviy ko‘pqavatli uylar quriladi, atrof esa obodonlashtiriladi.

Manbaning bildirishicha, Qo‘yliq ulgurji bozori yonida transport uchun yangi “cho‘ntak” ochish rejalashtirilgan. Bozor Toshkent shahri hududidan ko‘chirilganidan keyin esa vaziyat tubdan yaxshilanadi.