Farg‘ona viloyatida “Xavfsiz shahar” loyihasi doirasida kuzatuv kameralari o‘rnatish ishlari boshlandi. Bu haqda “Daryo” muxbiri Azizjon Ermatov xabar bermoqda.
Viloyat ichki ishlar boshqarmasi tomonidan Qo‘qon shahar “Obod” mahallasidagi mavjud sakkizta ko‘chaning kirish-chiqish joylariga, kollej, maktab, maktabgacha ta’lim muassasalari va boshqa ijtimoiy obe’ktlarga kuzatuv kameralari o‘rnatildi.
“Obod” mahallasida 506 xonadonda 2000 nafardan ortiq aholi yashaydi. Hududda ikkita maktab, ikkita bog‘cha va kollej joylashgan. Kuzatuv kameralari aholi xavfsizligini ta’minlash, jinoyatlarning oldini olish, turar joylar, turli bino va inshootlarni muhofaza qilishda qo‘l kelmoqda. Barcha kameralar onlayn tarzda profilaktika inspektorining xizmat xonasiga ulangan. Bu real vaqt rejimida butun mahallani kecha-yu kunduz kuzatish imkonini beradi.
“Viloyatda bo‘yicha birinchi bo‘lib bu tizim bizning mahallamizda o‘rnatildi. Ayniqsa, ta’lim maskanlaridagi ichki kuzatuv kameralari o‘quvchilar davomatini nazorat qilish, bolalar xavfsizligini ta’minlashda katta yordam beryapti. Tez orada ‘Xavfsiz shahar’ loyihasi bo‘yicha barcha mahallalarda shunday texnik qo‘riqlash tizimlari yo‘lga qo‘yiladi”, — deydi Qo‘qon shahar IIB huquqbuzarliklar profilaktikasi bo‘limi katta inspektori Azimjon Yuldashev.
Viloyat IIBdan olingan ma’lumotga ko‘ra, Qo‘qon shahrida 3 yoshli bolaning o‘ldirilishi, Oltiariq tumanida 5 yashar qizchaning bedarak yo‘qolishi va fojeali o‘limi bilan bog‘liq og‘ir jinoyatlar kuzatuv kameralari yordamida tezkorlik bilan fosh etilgan.
Izoh (0)