Фарғона вилоятида «Хавфсиз шаҳар» лойиҳаси доирасида кузатув камералари ўрнатиш ишлари бошланди. Бу ҳақда «Дарё» мухбири Азизжон Эрматов хабар бермоқда.
Вилоят ички ишлар бошқармаси томонидан Қўқон шаҳар «Обод» маҳалласидаги мавжуд саккизта кўчанинг кириш-чиқиш жойларига, коллеж, мактаб, мактабгача таълим муассасалари ва бошқа ижтимоий обеъктларга кузатув камералари ўрнатилди.
«Обод» маҳалласида 506 хонадонда 2000 нафардан ортиқ аҳоли яшайди. Ҳудудда иккита мактаб, иккита боғча ва коллеж жойлашган. Кузатув камералари аҳоли хавфсизлигини таъминлаш, жиноятларнинг олдини олиш, турар жойлар, турли бино ва иншоотларни муҳофаза қилишда қўл келмоқда. Барча камералар онлайн тарзда профилактика инспекторининг хизмат хонасига уланган. Бу реал вақт режимида бутун маҳаллани кеча-ю кундуз кузатиш имконини беради.
«Вилоятда бўйича биринчи бўлиб бу тизим бизнинг маҳалламизда ўрнатилди. Айниқса, таълим масканларидаги ички кузатув камералари ўқувчилар давоматини назорат қилиш, болалар хавфсизлигини таъминлашда катта ёрдам беряпти. Тез орада ‘Хавфсиз шаҳар’ лойиҳаси бўйича барча маҳаллаларда шундай техник қўриқлаш тизимлари йўлга қўйилади», — дейди Қўқон шаҳар ИИБ ҳуқуқбузарликлар профилактикаси бўлими катта инспектори Азимжон Юлдашев.
Вилоят ИИБдан олинган маълумотга кўра, Қўқон шаҳрида 3 ёшли боланинг ўлдирилиши, Олтиариқ туманида 5 яшар қизчанинг бедарак йўқолиши ва фожеали ўлими билан боғлиқ оғир жиноятлар кузатув камералари ёрдамида тезкорлик билан фош этилган.
Изоҳ (0)