Zamonaviy futbolda Pep Gvardiola eng ko‘p tilga olinadigan nomlardan biri hisoblanadi. Uni kimdir faqat boy klublarni boshqarib, kuchli va qimmat o‘yinchilarni sotib olgan holda chempion qiladi desa, yana kimdir uning zamonaviy futbolga olib kirgan o‘ziga xos uslubi haqida tinmay so‘zlaydi. Hamma gap-so‘zlar o‘z yo‘liga. Xabaringiz bo‘lsa kerak, Pep Angliyadagi o‘zining ikkinchi mavsumida “Manchester Siti” bilan muddatidan avval chempionlikni qo‘lga kiritdi. Shu boisdan, Pepning murabbiylik faoliyatiga bir nazar solib o‘tish foydadan holi bo‘lmas, deb umid qilamiz.
“Barselona” – 2008/09
Pepning ertagi 2008-yildan boshlanadi. U aynan o‘sha yili “Barselona”ning ikkinchi jamoasidan bosh jamoaga bosh murabbiy etib tayinlanadi. Pep jamoa tepasiga kelgani zahot, klubni Deku hamda Ronaldinyo bilan xayrlashishga ishontira oldi. Ularning o‘rniga esa “Sevilya”dan Dani Alvesni hamda jamoa tarbiyalanuvchisi Pikeni esa “Manchester Yunayted”dan sotib olishga erishdi. Bosh murabbiy bo‘lib ishlashni boshlagan Pep 1-mavsumning o‘zidayoq “Barselona” bilan Ispaniya chempionligini qo‘lga kiritdi. Jamoa mayda La Liga chempionligini nishonladi. Chempionatda 105 ta gol urib, Xuande Ramos boshchiligidagi “Real”ni 9 ochkoga ortda qoldirdi. Mavsumni esa Ispaniya kubogi hamda Yevropa Chempionlar Ligasini ham yutgan holda, trebl bilan yakunladi. Bu har qanday yosh murabbiy orzu qiladigan murabbiylik faoliyatining debochasi edi.
“Barselona” – 2009/10
Pepning “Barselona”dagi ikkinchi mavsumi birinchisi singari kechmadi. Jamoaning asosiy hujumchisi Eto’O “Inter” to‘purari Ibragimovich bilan almashtirildi. “Shaxtyor”dan Dmitriy Chigrinskiy sotib olindi. Mavsum so‘ngida esa ushbu xaridlar o‘zini oqlamagani ma’lum bo‘ldi. Zlatan Pep bilan umuman chiqisha olmagan bo‘lsa, Chigrinskiy asosiy tarkib o‘yinchisiga aylana olmadi. Yevropa Chempionlar Ligasi yarim finalida Joze Mourinyoning “Inter”i Pep jamoasini mag‘lub etgan, holda finalga yo‘l oldi va finalda “Bavariya”ni ham mag‘lub etib, kubokka ega chiqdi. Ammo “Barselona”ni La Liga na “Real” va na boshqa jamoa to‘xtata oldi. Pep jamoasi La Ligada 99 ochko to‘plab, Pellegrini “Real”ini uch ochkoga ortda qoldirgan holda ketma-ket ikki bor Ispaniyada tengsiz bo‘ldi. Bu klub tarixidagi 20-chempionlik edi.
“Barselona” – 2010/11
YeChLdagi muvaffaqiyatsizlikdan so‘ng Pep yozda jamoada bir qator o‘zgarishlarga qo‘l urdi. Klubni yozda Chigrinskiy, Yaya Ture, Zlatan hamda Anri tark etdi. Rahbariyat Pepning istagi bilan Xavyer Maskerano va David Vilyani jamoaga olib keldi. Azaliy raqib “Real” esa jamoaga bosh murabbiy etib Joze Mourinyoni tayinladi. “Real” “Barsa”dan ko‘p gol urdi, biroq Pep jamoasin La Liga chempionligini baribir o‘ziniki qila oldi. Qo‘shimchasiga Yevropa Chempionlar Ligasini 1 yillik tanaffusdan keyin yana o‘ziniki qilib oldi.
“Bavariya” – 2013/14
2012-yil yozida Gvardiola “Barselona”dan ketdi va bir yil dam olishga qaror qildi. Pepga eng yaxshi taklifni endigina Yupp Xaynkes boshchiligida trebl qayd etgan “Bavariya” berdi. Pep o‘z omadini Germaniyada sinab ko‘rishga qaror qildi va xato qilmagani mavsum so‘ngida oydinlashdi. Gvardiola birinchi urinishdayoq Bundesliga chempionligini qo‘lga kiritdi. Klubdagi ilk mag‘lubiyatini bundesliganing 29-turiga kelibgina qabul qildi. Ikkinchi o‘rindagi Dortmundning “Borussiya”si esa Pep jamoasidan 19 ochko ortda qolib ketdi. Ammo jamoaga Yevropa Chempionlar Ligasini qo‘lga kiritish nasib etmadi.
“Bavariya” – 2014/15
“Bavariya” yozda Pepning xohishi bilan klubga Robert Levandovski va Xabi Alonsa xarid qildi. Jamoani esa Mario Manjukich, Toni Kroos hamda Jerdan Shakiri tark etdi. Kloppning “Borussiya”si mavsumni omadsiz o‘tkazdi. Pep jamoasi esa yana osonlik bilan chempionlikni qo‘lga kiritdi. “Volfsburg” 10 ochkoga ortda qoldirildi. Biroq “Bavariya” bilan Gvardiolaga yana Yevropa Chempionlar Ligasini qo‘lga kiritish nasib etmadi.
“Bavariya” — 2015/16
2015-yil yozida “Bavariya” rahbariyatini klubda o‘zgarishlar vaqti yetganiga ishontira oldi. Jamoani ko‘pyillik yetakchisi Bastian Shvaynshtayger tark etdi. Joshua Kimmix, Kingsli Koman, Arturo Vidal va Duglas Kosta kabi o‘yinchilar jamoaga taklif etildi. “Bavariya” “Borussiya D” 10 ochkoga ortda qoldirib, ketma-ket 3-bor Pep qo‘l ostida Bundesliga chempionligini qo‘lga kirtdi. Lekin Pep baribir ham Myunxen klubi bilan Chempionlar Ligasi bosh sovriini qo‘lga kirita olmadi.
“Manchester Siti” – 2017/18
O‘tgan mavsum avvalida Pep Bundesligani APLga, “Bavariya”ni esa “Manchester Siti”ga almashtirishni lozim topdi. Gvardiolaning Angliyadagi birinchi mavsumi omadsiz kechdi. APL chempionligini Antonio Konte boshliq “Chelsi”ga boy berdi. Ammo ikkinchi mavsumda “Man Siti” tarkibini o‘zi xohlagan ko‘rinishga keltirib olgan Pep Angliyada muddatidan avval chempionlikka sazovor bo‘ldi. Derbida MYuga mag‘lub bo‘ldi, ammo “Yunayted”ning o‘zi “Vest Bromvich”ga keyingi turning o‘zidayoq mag‘lub bo‘lib, “Siti”ning chempion bo‘lishiga sabab bo‘ldi. Shu tariqa Gvardiola 9 murabbiylik mavsumining 7 tasida mamlakat chempioni bo‘ldi. U Mourinyo va Anchelottidan keyin 3 ta top-ligada chempion bo‘la olgan dunyodagi 3-murabbiyga aylandi.
Gvardiola futbol tarixidagi eng sovrindor murabbiylardan biri hisoblanadi. Uning hisobida umumiy hisobda 23 ta qo‘lga kiritilgan sovrinlar jamlanmasi mavjud.
“Sports.ru” ma’lumotlari asosida Asror Abdunazarov tayyorladi.
Izoh (0)