Ukrainadagi muzokaralarda Kiyev va Toshkent o‘rtasida aviareyslarni tezroq tiklash zarurligi qayd etildi

Kiyevda Ukraina iqtisodiy rivojlanish va savdo, O‘zbekiston tashqi savdo vazirliklari, O‘zbekistonning Kiyevdagi diplomatik missiyasi vakillari ishtirokida uchrashuv bo‘lib o‘tdi. Bu haqda “Jahon” xabar bermoqda.

Muloqot davomida Ukraina iqtisodiy rivojlanish va savdo vaziri o‘rinbosari Natalya Mikolskaya o‘zaro savdo-iqtisodiy va investitsiyaviy hamkorlik faollashishi muhimligini ta’kidladi.

Toshkent va Kiyev o‘rtasida to‘g‘ridan-to‘g‘ri reyslarni tiklash bo‘yicha kelishuvlarni tezroq amalga oshirish zarurligi qayd etildi. Ikki davlat aviatsiya rasmiylari 2017-yil 12-dekabrida imzolangan protokol haftasiga ikki bor parvozlarni yo‘lga qo‘yishni ko‘zda tutadi.

Tomonlar konditer mahsulotlari va yuk avtomobillariga nisbatan aksiz solig‘i qo‘llanishi masalasini ham muhokama qildi. Dastlabki maslahatlashuv va muzokaralarsiz O‘zbekiston tovarlariga qo‘shimcha cheklov choralari qo‘llanmasligi bo‘yicha kelishuvga erishildi. Ukraina tomoniga mahalliy bozorni o‘rganish va taqdimotlar o‘tkazish uchun yuk avtomobil texnikasi ishlab chiqaruvchilarini O‘zbekistonga yuborish taklif qilindi.

“O‘zavtosanoat”, MAN Auto Uzbekistan va “SamAvto” rahbarlari uchun “Inter Avto Treyding” va “Avtoekspo” kompaniyalari bilan muzokaralar uyushtirildi. Ular davomida Ukrainadagi shahar ma’muriyatlari va kommunal tizimlar uchun avtobuslar, yuk va maxsus texnika yetkazib berishning dastlabki shartlari kelishib olindi.