“Toshkent savdo markazi” (sobiq “Abu-Saxiy” bozori) bosh direktori Alisher Husainov va “Kun.uz” xodimlari ishtirokida 28-mart kuni bozor hududida nashr muxbirlari faoliyatiga to‘sqinlik qilingani holati yuzasidan suhbat uyushtirildi.
Bosh direktor mazkur voqeadan bexabar ekanligi va yuzaga kelgan ko‘ngilsiz voqea uchun uzr so‘rab, xizmat tekshiruvi o‘tkazishga buyruq berishi haqida ma’lum qildi.
30-mart kuni esa xizmat tekshiruvi jarayonida korxonaning ayrim xodimlari tomonidan elektron OAV vakillariga nisbatan nomunosib hatti-harakatlar sodir etilganligi aniqlandi.
Tekshiruv xulosasiga asosan tezkor ishlar va rejim nazorati boshlig‘i o‘rinbosari T.Idrisaliyev, infrastrukturadan foydalanganlik hamda bino va inshootlarning ijarasi uchun to‘lovlar nazorati bo‘limi menejerlari R.Hotamov, M.Sharipov va B.Jo‘rayev, shuningdek savdo markazi xavfsizlik xizmati rahbari vazifasini bajarib turgan videokuzatuv xizmati katta operatori B.Sayidov egallab turgan lavozimlaridan ozod qilinib, ishdan bo‘shatildi.
Shuningdek, korxonaning infrastrukturadan foydalanganlik hamda bino va inshootlarning ijarasi uchun to‘lovlar nazorati bo‘limi boshlig‘i A.E.Ahmedov, xavfsizlikni ta’minlash bo‘yicha xizmat boshlig‘i U.Rahimov va boshqa bir qator xodimlar qattiq ogohlantirildi.
Bosh direktorning birinchi o‘rinbosariga bu kabi holatlarga yo‘l qo‘ymaslik choralarini ko‘rish topshirildi.
Izoh (0)