22-fevral kuni Xalqaro press klubning navbatdagi “O‘zstandart: islohotlarning yangi bosqichi, integratsiya va muammolar tahlili” mavzusida sessiyasi bo‘lib o‘tdi.
Sessiyada “O‘zstandart” agentligi bosh direktori Abduhamid Karimov, “O‘zstandart” agentligi bosh metrologi Abdurauf Abduqayumov va axborot-ma’lumot markazi direktori Shokir Alimov spikerlar sifatida ishtirok etdi.
“O‘zstandart” agentligi tomonidan, Toshkent shahri va Toshkent viloyatining savdo rastalarida sotilayotgan 56 turdagi (sut va sut mahsulotlari, kolbasa mahsulotlari, ichimlik suvi, bolalar ozuqasi, kakao va sharbat) mahsulotlarining nazorat xaridi amalga oshirildi va ushbu mahsulotlar sinov laboratoriyalarida sinovdan o‘tkazildi. Sinov natijalariga ko‘ra 18 turdagi sut va go‘sht mahsulotlari me’yoriy hujjat talablariga sifat va xavfsizlik ko‘rsatkichlari bo‘yicha nomuvofiqligi aniqlandi.
O‘tkazilgan sinovlar natijasida “Xasanmolprom”XF tomonidan ishlab chiqarilgan “Garmoniya” 30% qaymog‘i, “Izzat” XK tomonidan ishlab chiqarilgan 2,5% “Tvorog” mahsuloti, Good food organic MChJ tomonidan ishlab chiqarilgan quyultirilgan sut mahsuloti, “Tong sutlari” MChJ tomonidan ishlab chiqarilgan “25% Smetana” va “35% Qaymoq” mahsulotlari,
“Xamidaxon barkali Tayyorlov” MChJ tomonidan ishlab chiqarilgan 2,5% yogurt va 20% smetana mahsulotlari, “Believe Milk Food” MChJ tomonidan ishlab chiqarilgan “Shaftoli” mazali yogurt, “Molochniy kray” MChJ tomonidan ishlab chiqarilgan “30% qaymoq”, “15% Smetana” mahsulotlari, “Angren meat-milk” MChJ tomonidan ishlab chiqarilgan “Best” smetanasi fizik-kimyo ko‘rsatkichlari bo‘yicha me’yoriy hujjat talablariga nomuvofiq, deb topildi.
Shuningdek, nomuvofiqliklar “Kozimjon Omad» MCHJ va “Pokiza Niyat” MCHJlari tomonidan ishlab chiqarilayotgan kolbasa mahsulotlarida ham aniqlandi.
Sut mahsulotlarida aniqlangan nomuvofiqliklar asosan mahsulotlarning tashqi ko‘rigi, hidi, mazasi, tarkibidagi yog‘ miqdorining belgilangan talabda emasligi bo‘yicha, kolbasa mahsulotlari esa tarkibidagi kraxmal moddalarning belgilangan talablardan yuqori ekanligi bo‘yicha me’yoriy hujjat talablariga nomuvofiq, deb topildi.
Izoh (0)