Amerikalik senatorlar Ben Kardin, Sherrod Braun va Robert Menendes mamlakat moliya vazirligi tomonidan tayyorlangan, “Kreml ro‘yxati” sifatida mashhur bo‘lgan ma’ruza ishtirokchilariga qarshi yangi sanksiyalar kiritish talabi ilgari surilgan rezolyutsiya loyihasini tayyorladi, deb yozadi “RBK” Politico nashriga tayanib.
Nashr qayd etishicha, ma’muriyatning yanvar oxirida e’lon qilingan, qo‘llanilayotgan choralar samarali ta’sir qilayotganligi tufayli Rossiyaga qarshi yangi sanksiyalar kiritmaslik qarori “demokratlarni g‘azablantirgan”.
“Ma’muriyat milliy xavfsizlikka ochiq-oydin xavf qarshisida ko‘rsatgan yengiltaklik xavotir uyg‘otadi, bunday davom etishi kerak emas”, — dedi Kardin rezolyutsiya bo‘yicha bayonotida.
“Kreml ma’ruzasi” — katta ehtimol bilan Amerika sanksiyalar amal qiladigan rossiyalik mansabdorlar va biznesmenlar ro‘yxati o‘tgan hafta e’lon qilindi. Unga 210 kishi: 114 nafar yirik amaldor va 96 oligarx kiritildi.
Izoh (0)