Toshkent shahrida svetoforning qizil chirog‘iga o‘tib ketgan Nexia haydovchisi jarimadan qochish uchun MAN avtobusi tagiga yotib oldi, deb xabar beradi “Gazeta.uz”.
Videosi ijtimoiy tarmoqlarga tarqalgan mazkur hodisa 10-fevral kuni soat 14:35 da Mirobod tumanidagi Grand Mir mehmonxonasi yonida yuz bergan.
“Haydovchi svetoforning taqiqlovchi chirog‘ida harakatlangan. Uning orqasidan patrul mashinasi kelayotgan edi. Haydovchi qoidabuzarlik sodir etganini tan olgan. Biroq, dalolatnoma tuzilayotgan paytda u sharoiti og‘irligi va jarimani to‘lay olmasligini aytib, shikoyat qila boshlagan. Shu paytda u jarimadan qochish maqsadida avtobus tagiga yotib olgan. U ijaraga olgan avtomobilini ishonchnoma asosida boshqargan, shuningdek kirakashlik bilan shug‘ullangan bo‘lishi mumkin”, — deyiladi xabarda.
Videoda haydovchining avtobus tagidan haydovchilik guvohnomasini qaytarishlarini so‘rab baqirayotgani aks etgan.
Haydovchiga nisbatan yo‘l harakati qoidalarini buzganlikdan tashqari O‘zbekiston Respublikasi ma’muriy javobgarlik to‘g‘risidagi kodeksning 194-moddasi (Ichki ishlar xodimining qonuniy talabini bajarmaslik) va 195-moddasi (Ichki ishlar organlari xodimlarining xizmat vazifasini bajarishiga to‘sqinlik qilish) bo‘yicha chora ko‘rilishi mumkin.
Birinchi modda bo‘yicha eng kam oylik ish haqining yarim baravaridan ikki baravarigacha jarima ko‘zda tutilgan bo‘lsa, ikkinchi modda bo‘yicha eng kam oylik ish haqining uch baravaridan besh baravarigacha jarima yoki 15 sutkagacha ma’muriy qamoq jazosi qo‘llanilishi mumkin.
Qayd etilishicha, jazo turi sud qarori bilan aniqlanadi.
Izoh (0)