Surxondaryoda qishda kamida 1350 abituriyent talabaga aylandi. Ular yarim semestrda bir yillik o‘quv dasturini o‘zlashtiradi

Surxondaryo viloyatida 1-fevraldan uchta yangi oliygoh ish boshladi. Termizda Toshkent davlat pedagogika universiteti (TDPU) va Toshkent tibbiyot akademiyasi (TTA)ning filiallari ish boshlagan bo‘lsa, Denovda Termiz davlat universiteti (TerDU)ning faoliyati yo‘lga qo‘yildi. Pedagogika universitetining Termiz filiali va Denovdagi TerDU filiali ta’lim mutaxassislarini tayyorlashga ixtisoslashgan bo‘lsa, TTAning Termiz filiali, tushunarli holki, bo‘lajak shifokor kadrlarni o‘qitadi.

Nega aynan pedagogika va tibbiyot oliygohlari?

Viloyatda o‘qituvchi va shifokorlarga ehtiyoj yuqori. Masalan, viloyat hokimi Erkinjon Turdimovning so‘zlariga ko‘ra, Surxondaryoda 3 200 dan ortiq oliy ma’lumotli shifokor yetishmaydi (O‘zbekiston Milliy axborot agentligi (O‘zA) esa biroz boshqacharoq raqamlarni keltirmoqda — viloyatda kamida 1880 nafar malakali shifokorga ehtiyoj mavjud); vohaning shifokorlar bilan ta’minlanish darajasi — 48 foiz. Yangi oliygohlar mana shu bo‘shliqni to‘ldirishga xizmat qilishi ko‘zda tutilgan.

Bundan tashqari, O‘zAning qayd etishicha, Prezident Shavkat Mirziyoyev 19—20-yanvar kunlari Surxondaryoga amalga oshirgan safari chog‘ida viloyatdagi ta’lim va sog‘liqni saqlash tizimlarida mavjud muammolarni bartaraf etish, kadrlarga bo‘lgan ehtiyojni ta’minlash bo‘yicha tegishli topshiriqlar bergan. Qayd etish joiz, pedagogik yo‘nalishdagi har ikki yangi oliygohda sirtqi ta’lim yo‘nalishlari bor.

Qancha talaba o‘qishga qabul qilindi?

Bu boradagi raqamlar bir-biridan biroz farq qilmoqda. Aniqrog‘i, Surxondaryo viloyatidagi rasmiy manbalar va O‘zA e’lon qilgan raqamlar o‘rtasida kelishmovchilik bor.

“Surxon tongi” gazetasi xabariga ko‘ra, Tibbiyot akademiyasining filiali 300 nafar, Pedagogika universiteti filiali esa 520 nafar talabani o‘qishga qabul qilgan. Surxondaryo viloyati hokimi Erkinjon Turdimovning Facebook’dagi sahifasida e’lon qilingan raqamlar “Surxon tongi”niki bilan bir xil va bir qo‘shimcha ham bor — Denovdagi filialga 530 kishi o‘qishga kirgan (jami — 1350 nafar; taqqoslashgan uchun — Termiz davlat universiteti 2017/2018 o‘quv yilida 1800 nafar talabani o‘qishga qabul qilgan).

O‘zA Tibbiyot akademiyasi va Pedagogika universiteti filiallari qabul qilgan talabalar soni haqida “Surxon tongi” va Erkinjon Turdimov sahifasi bilan bir xil raqam keltirgan, biroq Denovdagi oliygohga 700 ga yaqin talaba qabul qilingani haqida yozgan. Oliy va o‘rta maxsus ta’lim vazirligi saytida faqat yangi OTMlar ishga tushayotgani haqida xabar berilgan xolos.

O‘qishga qabul qilingan talabalar haqida

“Surxon tongi”ning yozishicha, TTAning Termiz filialida o‘qishni boshlagan talabalar Davlat qabul komissiyasining 23-yanvardagi 12-sonli bayonnomasi bilan o‘qishga kirgan. Ular Surxondaryodagi barcha tumanlar kesimida saralab olingan va ularning ish joyi hozirdanoq aniq.

Pedagogika universiteti filialiga Termiz shahri, Termiz, Angor, Sherobod, Muzrabot, Qiziriq, Boysun va Jarqo‘rg‘on tumanlarida istiqomat qilayotganlar qabul qilingan. Surxondaryo televideniyesi axborotiga ko‘ra, ular orasida Sherobodning Poshxurt qishlog‘idagi 33-maktabda 28 yildan beri dars berib kelgan boshlang‘ich ta’lim o‘qituvchisi ham bor.

Surxondaryo viloyati hokimining Facebook’dagi sahifasida yozilishicha, Denovdagi oliygoh Qumqo‘rg‘on, Sho‘rchi, Oltinsoy, Sariosiyo, Uzun va Denov tumanlaridan talabalikka qabul qilinganlar uchun “iqtisodiy qulay”. Qayd etishlaricha, o‘qishga qabul qilinganlarning bari to‘lov-kontrakt asosida o‘qiydi.

O‘zA va Surxondaryo televideniyesida talabalik baxtiga erishganlardan ba’zilarining intervyulari e’lon qilingan — ular avvalgi yillarda pedagogika va tibbiyot yo‘nalishidagi OTMlarga hujjat topshirib, yiqilgan abituriyentlardir.

“Termiz davlat universitetiga uch yil hujjat topshirib, imtihondan yiqilganman. Uchinchi yil rus tili fakultetiga o‘qishga kirish uchun imtihon topshirib, 98 ball bilan yiqildim. Fevral oyida esa universitetga o‘qishga qabul qilishdi. Xursandchiligimning cheki yo‘q”, — deydi TDPU Termiz filialiga o‘qishga qabul qilingan jarqo‘rg‘onlik Mahliyo Tog‘aynazarova.

“Shifokorlik kasbini egallash uchun uch yildan buyon oliy ta’lim muassasasiga hujjat topshirdim. O‘tgan yili ham 196 ball bilan o‘qishga kirolmadim. Mana, bugun quvonchimning cheki yo‘q. Talabalar safidan o‘rin oldim. Tumanimizdan uncha uzoq bo‘lmagan shaharda o‘qish baxtiga muyassar bo‘lganimdan ota-onam ham xursand”, — deydi sho‘rchilik Farrux Allanazarov.

“O‘g‘lim Akmaljon bolalikdan shifokor bo‘lishni orzu qilardi. Shu maqsadda o‘tgan yili Toshkent tibbiyot akademiyasiga hujjat topshirdi, lekin uning o‘qishga qabul qilinishiga bir necha ball yetmay qoldi, xolos. Mana, bugun farzandimning orzusi ushalib, birinchilar qatorida talabalar safidan o‘rin oldi”, — deydi Termiz tumanida yashovchi Gulnoza Berdiqulova.

Ular birinchi kursni qachon tugatadi? Ularga kim dars beradi?

O‘quv yilining yarmi ortda qolib ulgurganiga qaramay, O‘zbekiston oliy va o‘rta va maxsus ta’lim vaziri Inomjon Majidovning so‘zlariga ko‘ra, uchala filialda ham birinchi kurs dasturi alohida ishlab chiqilgan rejalar asosida o‘quv yilining oxirigacha to‘liq bajariladi. “Buning uchun hamma sharoitlar yaratildi, Toshkent shahridan tayanch oliy ta’lim muassasalarining tayanch o‘qituvchilari jalb etilyapti, Termizdagi mavjud ilmiy, pedagogik salohiyatdan foydalanilyapti”, — dedi vazir Surxondaryo televideniyesiga bergan intervyusida.

Xususan, “Surxon tongi”ning yozishicha, TDPU Termiz filialida talabalarga 40 dan ortiq professor va o‘qituvchilar ta’lim-tarbiya beradi, ularning 15 nafari ilmiy darajaga ega.

“Prezidentimiz bu yerdagi dars mashg‘ulotlari Toshkentdagi bazaviy oliy ta’lim muassasasidan sifat jihatdan hech qancha kam bo‘lmasligi kerakligi, qolaversa, Toshkentdagi professor o‘qituvchilar darslarni masofaviy ta’lim texnologiyalaridan foydalangan holda o‘tishini belgilab bergandilar. Bugungi kunda uchala filialda ham Toshkentdagi oliy ta’lim muassasasida bo‘layotgan dars mashg‘ulotlari parallel ravishda olib borilyapti. Bugun kun texnika va texnologiyalari bunga imkon beradi”, — deya qo‘shimcha qildi Inomjon Majidov.

Masalan, O‘zAning qo‘shimcha qilishicha, TTA Termiz filialidagi o‘qishning birinchi kunidayoq Toshkentdagi akademiya professor-o‘qituvchilari onlayn rejimda dastlabki ma’ruzalarni o‘qigan.