Сурхондарё вилоятида 1 февралдан учта янги олийгоҳ иш бошлади. Термизда Тошкент давлат педагогика университети (ТДПУ) ва Тошкент тиббиёт академияси (ТТА)нинг филиаллари иш бошлаган бўлса, Деновда Термиз давлат университети (ТерДУ)нинг фаолияти йўлга қўйилди. Педагогика университетининг Термиз филиали ва Деновдаги ТерДУ филиали таълим мутахассисларини тайёрлашга ихтисослашган бўлса, ТТАнинг Термиз филиали, тушунарли ҳолки, бўлажак шифокор кадрларни ўқитади.
Нега айнан педагогика ва тиббиёт олийгоҳлари?
Вилоятда ўқитувчи ва шифокорларга эҳтиёж юқори. Масалан, вилоят ҳокими Эркинжон Турдимовнинг сўзларига кўра, Сурхондарёда 3 200 дан ортиқ олий маълумотли шифокор етишмайди (Ўзбекистон Миллий ахборот агентлиги (ЎзА) эса бироз бошқачароқ рақамларни келтирмоқда — вилоятда камида 1880 нафар малакали шифокорга эҳтиёж мавжуд); воҳанинг шифокорлар билан таъминланиш даражаси — 48 фоиз. Янги олийгоҳлар мана шу бўшлиқни тўлдиришга хизмат қилиши кўзда тутилган.Бундан ташқари, ЎзАнинг қайд этишича, Президент Шавкат Мирзиёев 19—20 январь кунлари Сурхондарёга амалга оширган сафари чоғида вилоятдаги таълим ва соғлиқни сақлаш тизимларида мавжуд муаммоларни бартараф этиш, кадрларга бўлган эҳтиёжни таъминлаш бўйича тегишли топшириқлар берган. Қайд этиш жоиз, педагогик йўналишдаги ҳар икки янги олийгоҳда сиртқи таълим йўналишлари бор.
Қанча талаба ўқишга қабул қилинди?
Бу борадаги рақамлар бир-биридан бироз фарқ қилмоқда. Аниқроғи, Сурхондарё вилоятидаги расмий манбалар ва ЎзА эълон қилган рақамлар ўртасида келишмовчилик бор.«Сурхон тонги» газетаси хабарига кўра, Тиббиёт академиясининг филиали 300 нафар, Педагогика университети филиали эса 520 нафар талабани ўқишга қабул қилган. Сурхондарё вилояти ҳокими Эркинжон Турдимовнинг Facebook’даги саҳифасида эълон қилинган рақамлар «Сурхон тонги»ники билан бир хил ва бир қўшимча ҳам бор — Деновдаги филиалга 530 киши ўқишга кирган (жами — 1350 нафар; таққослашган учун — Термиз давлат университети 2017/2018 ўқув йилида 1800 нафар талабани ўқишга қабул қилган).
ЎзА Тиббиёт академияси ва Педагогика университети филиаллари қабул қилган талабалар сони ҳақида «Сурхон тонги» ва Эркинжон Турдимов саҳифаси билан бир хил рақам келтирган, бироқ Деновдаги олийгоҳга 700 га яқин талаба қабул қилингани ҳақида ёзган. Олий ва ўрта махсус таълим вазирлиги сайтида фақат янги ОТМлар ишга тушаётгани ҳақида хабар берилган холос.
Ўқишга қабул қилинган талабалар ҳақида
«Сурхон тонги»нинг ёзишича, ТТАнинг Термиз филиалида ўқишни бошлаган талабалар Давлат қабул комиссиясининг 23 январдаги 12-сонли баённомаси билан ўқишга кирган. Улар Сурхондарёдаги барча туманлар кесимида саралаб олинган ва уларнинг иш жойи ҳозирданоқ аниқ.
Педагогика университети филиалига Термиз шаҳри, Термиз, Ангор, Шеробод, Музработ, Қизириқ, Бойсун ва Жарқўрғон туманларида истиқомат қилаётганлар қабул қилинган. Сурхондарё телевидениеси ахборотига кўра, улар орасида Шерободнинг Пошхурт қишлоғидаги 33-мактабда 28 йилдан бери дарс бериб келган бошланғич таълим ўқитувчиси ҳам бор.
Сурхондарё вилояти ҳокимининг Facebook’даги саҳифасида ёзилишича, Деновдаги олийгоҳ Қумқўрғон, Шўрчи, Олтинсой, Сариосиё, Узун ва Денов туманларидан талабаликка қабул қилинганлар учун «иқтисодий қулай». Қайд этишларича, ўқишга қабул қилинганларнинг бари тўлов-контракт асосида ўқийди.
ЎзА ва Сурхондарё телевидениесида талабалик бахтига эришганлардан баъзиларининг интервьюлари эълон қилинган — улар аввалги йилларда педагогика ва тиббиёт йўналишидаги ОТМларга ҳужжат топшириб, йиқилган абитуриентлардир.
«Термиз давлат университетига уч йил ҳужжат топшириб, имтиҳондан йиқилганман. Учинчи йил рус тили факультетига ўқишга кириш учун имтиҳон топшириб, 98 балл билан йиқилдим. Февраль ойида эса университетга ўқишга қабул қилишди. Хурсандчилигимнинг чеки йўқ», — дейди ТДПУ Термиз филиалига ўқишга қабул қилинган жарқўрғонлик Маҳлиё Тоғайназарова.
«Шифокорлик касбини эгаллаш учун уч йилдан буён олий таълим муассасасига ҳужжат топширдим. Ўтган йили ҳам 196 балл билан ўқишга киролмадим. Мана, бугун қувончимнинг чеки йўқ. Талабалар сафидан ўрин олдим. Туманимиздан унча узоқ бўлмаган шаҳарда ўқиш бахтига муяссар бўлганимдан ота-онам ҳам хурсанд», — дейди шўрчилик Фаррух Алланазаров.
«Ўғлим Акмалжон болаликдан шифокор бўлишни орзу қиларди. Шу мақсадда ўтган йили Тошкент тиббиёт академиясига ҳужжат топширди, лекин унинг ўқишга қабул қилинишига бир неча балл етмай қолди, холос. Мана, бугун фарзандимнинг орзуси ушалиб, биринчилар қаторида талабалар сафидан ўрин олди», — дейди Термиз туманида яшовчи Гулноза Бердиқулова.
Улар биринчи курсни қачон тугатади? Уларга ким дарс беради?
Ўқув йилининг ярми ортда қолиб улгурганига қарамай, Ўзбекистон олий ва ўрта ва махсус таълим вазири Иномжон Мажидовнинг сўзларига кўра, учала филиалда ҳам биринчи курс дастури алоҳида ишлаб чиқилган режалар асосида ўқув йилининг охиригача тўлиқ бажарилади. «Бунинг учун ҳамма шароитлар яратилди, Тошкент шаҳридан таянч олий таълим муассасаларининг таянч ўқитувчилари жалб этиляпти, Термиздаги мавжуд илмий, педагогик салоҳиятдан фойдаланиляпти», — деди вазир Сурхондарё телевидениесига берган интервьюсида.
Хусусан, «Сурхон тонги»нинг ёзишича, ТДПУ Термиз филиалида талабаларга 40 дан ортиқ профессор ва ўқитувчилар таълим-тарбия беради, уларнинг 15 нафари илмий даражага эга.
«Президентимиз бу ердаги дарс машғулотлари Тошкентдаги базавий олий таълим муассасасидан сифат жиҳатдан ҳеч қанча кам бўлмаслиги кераклиги, қолаверса, Тошкентдаги профессор ўқитувчилар дарсларни масофавий таълим технологияларидан фойдаланган ҳолда ўтишини белгилаб бергандилар. Бугунги кунда учала филиалда ҳам Тошкентдаги олий таълим муассасасида бўлаётган дарс машғулотлари параллел равишда олиб бориляпти. Бугун кун техника ва технологиялари бунга имкон беради», — дея қўшимча қилди Иномжон Мажидов.
Масалан, ЎзАнинг қўшимча қилишича, ТТА Термиз филиалидаги ўқишнинг биринчи кунидаёқ Тошкентдаги академия профессор-ўқитувчилари онлайн режимда дастлабки маърузаларни ўқиган.
Изоҳ (0)