Nurota tumanida yashovchi M.Mirqiyosova odamlar orasida tadbirkor-quruvchi sifatida tanilgandi. Viloyat miqyosidagi yirik bino va inshootlarni barpo etish bo‘yicha unga qator buyurtmalar kela boshladi, deya xabar beradi O‘zA.
Biroq u buyurtmachi tashkilotlar bilan til biriktirgan holda, davlat ahamiyatiga molik qurilishlarda ko‘plab o‘zlashtirishlarga yo‘l qo‘ydi. Oqibatda o‘tgan qisqa davrda 5 marta sudlandi.
Ammo M.Mirqiyosova bu qilmishlaridan tegishli xulosa chiqarmadi. O‘g‘lini ham bu ishlarga tortdi. Uni korxona rahbari sifatida ko‘rsatib, qalbaki hujjatlar asosida o‘zi rahbarlik qilib yuraverdi. Vaholanki, u jinoyat ishlari bo‘yicha Nurota tumani sudining 2015-yil 4-fevraldagi hukmiga ko‘ra, jarima jazosi va 3 yil muddatga mansabdorlik va moddiy javobgarlik bilan bog‘liq ishlarda ishlash huquqidan mahrum etilgandi.
Qalbaki hujjatlar tayyorlash va undan foydalanish hadisini olgan M.Mirqiyosova 2015—2016-yillar davomida Navoiy viloyati hokimligi “Yagona buyurtmachi xizmati” injiniring kompaniyasi buyurtmasi asosida Navoiy shahridagi sil kasalliklari dispanserida qurilish-ta’mirlash ishlarini bajaraman, deb 160 million so‘mdan ortiq mablag‘ni korxonasi hisob raqamiga o‘tkazishga erishdi. Lekin o‘tgan davr mobaynida dispanserda deyarli hech narsa qilinmadi. Amalga oshirgan ishlar ham sifatsizligi sabab umuman talabga javob bermaydi.
Bajarilgan ishlarni qabul qilib olishga mas’ul bo‘lgan Navoiy viloyati hokimligi “Yagona buyurtmachi xizmati” injiniring kompaniyasining “Loyihalarni boshqarish va qurilishni texnik kuzatish” bo‘limi mutaxassisi U.Qaytmasovning harakatlari esa hammasidan oshib tushdi. Umuman qilinmagan 149 million 169 ming 322 so‘mlik ishni qilindi, sifatsiz bajarilgan 11 million 832 ming 654 so‘mlik ishni esa nihoyatda mukammal, deb qabul qilib oldi. Davlat budjetidan ajratilgan mablag‘larning maqsadli sarflanishiga mas’ul bo‘lgan injiniring kompaniyasi xodimi ham o‘z manfaatini davlat manfaatidan ustun qo‘ydi.
Davlat mulkini “tuya” qilganlar tergov-surishtiruv davomida o‘zlashtirgan summalarini to‘ladi. Jinoyat ishlari bo‘yicha Navoiy viloyati sudining qaroriga asosan sudlanuvchilar qonunda belgilangan tartibda jazosini oldi.
Izoh (0)