Нурота туманида яшовчи М.Мирқиёсова одамлар орасида тадбиркор-қурувчи сифатида танилганди. Вилоят миқёсидаги йирик бино ва иншоотларни барпо этиш бўйича унга қатор буюртмалар кела бошлади, дея хабар беради ЎзА.
Бироқ у буюртмачи ташкилотлар билан тил бириктирган ҳолда, давлат аҳамиятига молик қурилишларда кўплаб ўзлаштиришларга йўл қўйди. Оқибатда ўтган қисқа даврда 5 марта судланди.
Аммо М.Мирқиёсова бу қилмишларидан тегишли хулоса чиқармади. Ўғлини ҳам бу ишларга тортди. Уни корхона раҳбари сифатида кўрсатиб, қалбаки ҳужжатлар асосида ўзи раҳбарлик қилиб юраверди. Ваҳоланки, у жиноят ишлари бўйича Нурота тумани судининг 2015 йил 4 февралдаги ҳукмига кўра, жарима жазоси ва 3 йил муддатга мансабдорлик ва моддий жавобгарлик билан боғлиқ ишларда ишлаш ҳуқуқидан маҳрум этилганди.
Қалбаки ҳужжатлар тайёрлаш ва ундан фойдаланиш ҳадисини олган М.Мирқиёсова 2015—2016 йиллар давомида Навоий вилояти ҳокимлиги «Ягона буюртмачи хизмати» инжиниринг компанияси буюртмаси асосида Навоий шаҳридаги сил касалликлари диспансерида қурилиш-таъмирлаш ишларини бажараман, деб 160 миллион сўмдан ортиқ маблағни корхонаси ҳисоб рақамига ўтказишга эришди. Лекин ўтган давр мобайнида диспансерда деярли ҳеч нарса қилинмади. Амалга оширган ишлар ҳам сифатсизлиги сабаб умуман талабга жавоб бермайди.
Бажарилган ишларни қабул қилиб олишга масъул бўлган Навоий вилояти ҳокимлиги «Ягона буюртмачи хизмати» инжиниринг компаниясининг «Лойиҳаларни бошқариш ва қурилишни техник кузатиш» бўлими мутахассиси У.Қайтмасовнинг ҳаракатлари эса ҳаммасидан ошиб тушди. Умуман қилинмаган 149 миллион 169 минг 322 сўмлик ишни қилинди, сифатсиз бажарилган 11 миллион 832 минг 654 сўмлик ишни эса ниҳоятда мукаммал, деб қабул қилиб олди. Давлат бюджетидан ажратилган маблағларнинг мақсадли сарфланишига масъул бўлган инжиниринг компанияси ходими ҳам ўз манфаатини давлат манфаатидан устун қўйди.
Давлат мулкини «туя» қилганлар тергов-суриштирув давомида ўзлаштирган суммаларини тўлади. Жиноят ишлари бўйича Навоий вилояти судининг қарорига асосан судланувчилар қонунда белгиланган тартибда жазосини олди.
Изоҳ (0)