Psixolog: O‘zbekistonda qaynotalarning shilqimligidan so‘ng ajrashib ketgan kelinlar ko‘p (video)

O‘zbekistonda qaynotasining shilqimligidan aziyat chekayotgan kelinlar soni kam emas. Bu fikr O‘zbekiston psixologlar assotsiatsiyasi a’zosi, assotsiatsiyaning Toshkent shahri va Toshkent viloyati bo‘limlari rahbari Shoira Isoqova tomonidan “O‘zbekiston” telekanalining “Uchburchak” ko‘rsatuvida bildirildi.

23-dekabr kuni “Uchburchak” tok-shousida Muxlisa ismli kelin chiqish qilib, unga qaynotasi sevgi izhor qilgani, buning ortidan oilasi buzilib ketayotgani haqida ma’lum qilgan edi. Ko‘rsatuvning 6-yanvar sonida kelini tomonidan shilqimlikda ayblangan qaynota va uning ayoli chiqish qilib, kelinning so‘zlarini rad etdi.Psixolog Shoira Isoqova esa O‘zbekistonda bunday holatlar kam emasligini ma’lum qilib, bu muammodan qochish emas, balki uning yechimini topish ustida birgalikda ish olib borish zarurligini ta’kidlagan. Ayni vaqtda, u bunday holatlar statistikasi bo‘yicha biror raqam keltirmagan.

Men bu ko‘rsatuvni diqqat-e’tibor bilan ko‘rdim va bu voqea men uchun sir emas. Bunday holatlar, bunday munosabat bo‘yicha murojaat qilib kelayotgan, oilasi bilan ajrashib ketgan kelinlarimizning soni ko‘p.

Biz muammodan qochishimiz emas, bu muammoning yechimini topish ustida ish olib borishimiz kerak. “O‘zbekona mentalilet” dedik, “tarbiya” dedik va hokazo. Lekin shaxsning nafsoniyati-chi, oriyati-chi?

Mana shu ko‘rsatuv odamlarni ozgina bo‘lsa ham hushyor bo‘lishga chaqirdi, hushyor bo‘lishga da’vat etdi. Bu shunchaki da’vat emas, balk qilayotgan har ishimizni, bosayotgan har bir qadamimizni, har bir xatti-harakatimizni nazorat qilishga o‘rgatdi.

Shoira Isoqova, psixolog