AQSh Harbiy-havo kuchlari Rossiyaning Su-30 samolyotlari tutib qolingan videoni e’lon qildi

Amerika Harbiy-havo kuchlari Boltiq dengizi ustida Rossiyaning ikkita qiruvchi samolyoti kuzatib borilgani tasvirlangan videorolikni e’lon qildi. Pentagonning tasdiqlashicha, hodisalar 2017-yilning noyabr va dekabr oylarida sodir bo‘lgan, deb xabar berdi “RIA Novosti”.

Birinchi rolikda ikkita F-15 qiruvchilari Rossiya Harbiy-dengiz kuchlariga tegishli deya taxmin qilingan ikkita Su-30 samolyotining tutib qolgani tasvirlangan. Voqea 2017-yilning 23-noyabrida sodir bo‘lgan.

“Rossiya samolyotlari aviadispetcherlar talab qilgan kodlarni, shuningdek, parvoz rejasini taqdim etmaganligi sabab ularni tutib qolish tashkillashtirilgan edi”, — deyiladi xabarda.

Videoning ikkinchi qismi 13-dekabr kuni tasvirga olingan bo‘lib, unga ham Rossiyaga tegishli ikkita qiruvchi samolyotining ortidan kuzatib borilgan. Idoraning ta’kidlashicha, ularni tutib qolish ishlari professional darajada amalga oshirilgan va “xalqaro parvoz qoidalari hamda xavfsizlik standartlari” buzilmagan.

Ikkala holatda ham osmonga AQSh Harbiy-havo kuchlariga tegishli 48-aviatsiya guruhining 493-qiruvchi eskadrilyasi uchuvchilari ko‘tarilgan.