Shavkat Mirziyoyev “O‘zbekiston Respublikasi Fanlar akademiyasining haqiqiy a’zolarini tasdiqlash to‘g‘risida”gi Farmonni imzoladi. Bu haqda O‘zA xabar bermoqda.
Hujjatga sharhda qayd etilishicha, Fanlar akademiyasi haqiqiy a’zoligiga oxirgi saylovlar 1995-yilda o‘tkazilgani mazkur Farmonning ahamiyatini yanada oshiradi. O‘tgan yillar mobaynida akademiklarning soni ikki martadan ko‘proqqa qisqardi va hozirgi kunga kelib akademiyaning atigi 63 nafar haqiqiy a’zosi qolgan edi.
Prezidentining “O‘zbekiston Respublikasi Fanlar akademiyasining haqiqiy a’zolarini tasdiqlash to‘g‘risida”gi Farmoni bilan 22 yillik uzoq tanaffusdan so‘ng akademiklikka tasdiqlash uchun eng munosib olimlarni tanlov asosida saralab olish ishlariga yakun yasalmoqda. Farmonga muvofiq, akademiya hay’ati va faoliyat ko‘rsatayotgan haqiqiy a’zolari tavsiyasiga ko‘ra, Fanlar akademiyasining 32 nafar yangi haqiqiy a’zolari tasdiqlandi.
Tasdiqlangan akademiklar qatoridan fizika-matematika, kimyo, biologiya, texnika, qishloq xo‘jaligi, tarix, iqtisodiyot, filologiya, huquqshunoslik, pedagogika, tibbiyot fanlari hamda san’atshunoslik sohalarida ko‘zga ko‘ringan, qator muhim mezonlar bo‘yicha ko‘p bosqichli saralashdan muvaffaqiyatli o‘tgan olimlar o‘rin oldi.
Ular orasida Abdulla A’zamov, Ibrohim Abdurahmonov, Anatoliy Sagdullayev, Qalandar Abdurahmonov, Naim Karimov, To‘ra Mirzayev, Akmal Saidov, Anis Alaviy, Feruz Nazirov va boshqa ilm-fan vakillari bor.
Prezident, shuningdek, “O‘zbekiston Respublikasi Fanlar akademiyasining haqiqiy a’zolari hamda sobiq O‘zbekiston qishloq xo‘jaligi fanlari akademiyasining haqiqiy a’zolari va muxbir a’zolari faoliyatini yanada rag‘batlantirish chora-tadbirlari to‘g‘risida”gi Farmonga ham imzo chekdi. Farmonda 2018-yilning 1-yanvaridan boshlab:
- O‘zbekiston Respublikasi Fanlar akademiyasining haqiqiy a’zolari va sobiq O‘zbekiston qishloq xo‘jaligi fanlari akademiyasining haqiqiy a’zolariga eng kam oylik ish haqining 12 barobari;
- Sobiq O‘zbekiston qishloq xo‘jaligi fanlari akademiyasining muxbir a’zolariga eng kam oylik ish haqining 8 barobari miqdorida oylik gonorar to‘lanishi belgilab berildi.
Izoh (0)