Saudiya Arabistoni boshliq koalitsiya tomonidan 6—16-dekabr kunlari oralig‘ida amalga oshirilgan aviazarbalar oqibatida Yamanda 115 nafar tinch aholi vakillari halok bo‘ldi, 83 kishi tan jarohati oldi. Bu haqda “TASS” xabar bermoqda.
BMTning Inson huquqlari bo‘yicha oliy komissari boshqarmasi rasmiy vakili Rupert Kolvillning ma’lum qilishicha, ushbu raqamlar boshqarmaning Sanadagi idorasi tomonidan tasdiqlangan.
“Saudiya Arabistoni boshliq koalitsiyaning nisbatan ko‘paygan avizarbalari oqibatida tinch aholi orasida qurbonlar soni keskin oshganidan qattiq xavotirdamiz”, — dedi Kolvill.
Qayd etish joiz, aviazarbalar Yaman sobiq prezidenti Ali Abdulla Solih 4-dekabr kuni isyonchi xusiylar tomonidan o‘ldirilgach ko‘paygan.
Ma’lumot uchun, Yamanda 2014-yil avgustidan beri fuqarolar urushi davom etmoqda. Unda, Saudiya Arabistoni tomonidan qo‘llab-quvvatlanayotgan amaldagi prezident Abd Rabbu Mansur Hodiy bir tomon, isyonchi xusiylar ikkinchi tomon bo‘lib kurash olib bormoqda.
Izoh (0)