Саудия Арабистони бошлиқ коалиция томонидан 6—16 декабрь кунлари оралиғида амалга оширилган авиазарбалар оқибатида Яманда 115 нафар тинч аҳоли вакиллари ҳалок бўлди, 83 киши тан жароҳати олди. Бу ҳақда «ТАСС» хабар бермоқда.
БМТнинг Инсон ҳуқуқлари бўйича олий комиссари бошқармаси расмий вакили Руперт Колвиллнинг маълум қилишича, ушбу рақамлар бошқарманинг Санадаги идораси томонидан тасдиқланган.
«Саудия Арабистони бошлиқ коалициянинг нисбатан кўпайган авизарбалари оқибатида тинч аҳоли орасида қурбонлар сони кескин ошганидан қаттиқ хавотирдамиз», — деди Колвилл.
Қайд этиш жоиз, авиазарбалар Яман собиқ президенти Али Абдулла Солиҳ 4 декабрь куни исёнчи хусийлар томонидан ўлдирилгач кўпайган.
Маълумот учун, Яманда 2014 йил августидан бери фуқаролар уруши давом этмоқда. Унда, Саудия Арабистони томонидан қўллаб-қувватланаётган амалдаги президент Абд Раббу Мансур Ҳодий бир томон, исёнчи хусийлар иккинчи томон бўлиб кураш олиб бормоқда.
Изоҳ (0)