18-oktabr, chorshanba kuni Pekinda ochiladigan mamlakat kommunistlar partiyasi syezdi arafasida Xitoyda OAVning Shimoliy Koreya haqidagi xabarlariga qat’iy cheklovlar o‘rnatildi. Bu haqda Kyodo agentligi manbalariga tayanib, “TASS” xabar bermoqda.
Manbalarga ko‘ra, Xitoy OAVlariga Pxenyan raketa-yadro dasturi haqida o‘z materiallarini tayyorlash va chop etishdan voz kechish, bu borada faqat rasmiy xabarlar bilan cheklanish tavsiya etilgan.
Agentlik Pekin KXDR vaqti-vaqti bilan Xitoydagi muhim tadbirlar payti yoki ularning arafasida turli keskin harakatlarni amalga oshirayotganidan tashvishda ekanligini qayd etmoqda.
Jumladan, Shimoliy Koreya Pekinda may oyida 30 davlat vakillari ishtirokida bo‘lib o‘tgan “Buyuk ipak yo‘li iqtisodiy kamari”ga bag‘ishlangan anjuman vaqtida ballistik raketa sinovini o‘tkazdi. KXDRning oltinchi va eng kuchli yadro sinovi esa Xitoyda BRIK sammiti ochilishi arafasiga to‘g‘ri keldi.
Izoh (0)