Shveysariya va fransuz arxeologlari Sakkaradagi “ehromlar vodiysi”da qadimgi podshohlikning so‘nggi fir’avnlaridan biri Pepi II onasining qabrini bezagan oltin uchlik — piramidionni topdi. Bu haqda “RIA Novosti” xabar bermoqda.
“Biz bu toshni fir’avn Pepi I ehromidan shimolda, uning turmush o‘rtog‘i, qadimgi Misr hukmdorlarining oltinchi sulolasi vakili Pepi II onasi malika Ankxnespepi I ehromi bo‘lishi taxmin qilingan joyda aniqladik. Shu paytgacha bizda bunday piramidionni topishimizdan darak beruvchi hech qanday alomat yo‘q edi”, — deydi qazilma ishlari rahbari Filipp Kollomber.
Piramidionning balandligi 1,3, uzunligi 1,1 metr bo‘lib, toshning yuqori qismi buzilgani, biroq asosi va quyi qismi yaxshi saqlangani bildirilmoqda.
Ma’lumot uchun, Misrda barpo etilgan deyarli barcha ehromlar cho‘qqisi oltin va boshqa qimmatbaho metallar qoplangan maxsus tosh — piramidion bilan bezatilgani tufayli o‘nlab kilometr uzoqdan ko‘rinib turgan.
Izoh (0)