11-oktabr kuni O‘zbekiston Prezidenti Shavkat Mirziyoyev Sochida bo‘lib o‘tgan MDH davlatlari rahbarlari kengashi sammitida ishtirok etdi va nutq so‘zladi. Bu haqda Uz24 xabar berdi.
Davlat rahbari o‘z nutqida O‘zbekiston Hamdo‘stlik mamlakatlari bilan savdo-iqtisodiyot, investitsiya, transport, turizm, ilm-fan, ta’lim va xavfsizlik sohalaridagi hamkorlikni rivojlantirishdan manfaatdorligini ta’kidladi.
“MDHning biz avval ishtirok etmagan qator soha tashkilotlari faoliyatiga qo‘shilishga tayyormiz. Bizning asosiy maqsadimiz — MDHda O‘zbekiston siyosatini faollashtirish bo‘yicha ‘yo‘l xaritasi’ni ishlab chiqishdir. Ishonchim komilki, bu bizning munosabatlarimizda yangi sahifa ochishga imkon beradi va ko‘p tarmoqli hamda samarali hamkorlikni kengaytiradi”, — dedi Shavkat Mirziyoyev.
Prezident O‘zbekiston 2020-yilda MDHga raislik qilishga va navbatdagi sammitni Toshkentda o‘tkazishga tayyorligini qayd etdi.
Shavkat Mirziyoyev, shuningdek, O‘zbekistonning MDHdagi oltita ahamiyatga molik jihatlarni sanab o‘tdi:
1. Hamkorlik maydonida “biror mustasnoliklar va to‘siqlarsiz” erkin savdo hududlarini shakllantirish;
2. MDH maydonida samarali transport tizimini rivojlantirish;
3. Amaldagi ilmiy-texnikaviy hamkorlikni va ta’lim almashinuvini kengaytirish;
4. Sayyohlik sohasini rivojlantirish;
5. Harbiy-texnikaviy sohada kooperatsiya darajasini oshirish, hamkorlikdagi dasturlar va loyihalarni ishlab chiqish;
6. Huquqni muhofaza qiluvchi organlar va maxsus xizmatlar bilan jinoyatchilik, terrorizm, narkotik vositalarning noqonuniy aylanishi va odam savdosiga qarshi murosasiz kurashish bo‘yicha o‘zaro hamkorlik qilish.
Izoh (0)