“Yunayted” Lukakuni 75 millionga, “Chelsi” Moratani 80 millionga oldi. Kim kuchli?

Angliya chempionligi uchun harakat qiladigan “Manchester Yunayted” va “Chelsi” klublari hujumchi sotib olishda o‘ziga xos raqobatni yuzaga keltirdi.

Har ikki klub ispaniyalik Alvaro Morata yoki belgiyalik Romelu Lukakudan birini o‘z safida ko‘rishni istagandi. Bunda birinchi qadamni Joze Mourinyo jamoasi qo‘yib berdi va Lukakuni 75 million yevroga xarid qildi.

Keyinroq Antonio Konte murabbiyligidagi “Chelsi” Madridning “Real” klubidan Alvaro Moratani 80 million yevro sarflab sotib oldi.

“Championat.asia” bunda qaysi futbolchi kuchliroq degan savolni qo‘yib, ularning statistikasini taqdim etdi.

24 yoshli Romelu Lukaku faoliyati davomida 375 ta o‘yinda maydonga tushgan va 168 ta gol urishga muvaffaq bo‘lgan. 25 yoshga to‘lgan Alvaro Morata esa 291 o‘yinda 112 ta gol urishga erishgan.

Bu, albatta, nisbiy solishtirish. Haqiqiy raqobat avgust oyining so‘nggi 10 kunligida start oladigan Angliya Premyer-ligasining mavsum yakuniga qadar davom etadi. O‘sha chempionat bu ikki futbolchi o‘z klubiga qanday yordam bera olishini ko‘rsatadi.