Iste’molchilardan energiya resurslaridan qarzdorlikni “bartaraf qilish” uchun poralar olgan nazoratchilarga nisbatan jinoiy ish qo‘zg‘atildi

Bosh prokuratura huzuridagi Majburiy ijro byurosi direktori Botir Qudratxo‘jayev O‘zAga bergan intervyusida gaz va elektr ta’minoti sohasidagi, asosan to‘lovlarni undirishga javobgar bo‘lgan nazoratchilar tomonidan amalga oshirilgan jinoyatlar haqida gapirib berdi.

Firibgarlik, poraxo‘rlik va energiya resurslari iste’moli uchun to‘lovlardan kelib tushgan mablag‘larni o‘g‘irlash holatlari yuzasidan jami 40 ta jinoiy ish qo‘zg‘atilgan, shularning 18 tasi nazoratchilarga nisbatan ochilgan. 13 ta holatda iste’molchilardan qarzdorlikni “bartaraf qilish” uchun poralar olingan.

Chunonchi, Buxoro tuman gaz ta’minoti korxonasi nazoratchilaridan biri ikki iste’molchining 4,6 million so‘m miqdoridagi qarzini “yopish” uchun ulardan 400 dollar va 2 million so‘m olgan. Iste’molchilarga to‘lov amalga oshirilgani haqida qalbaki hujjatlar berilgan.

Sirdaryo viloyati Mirzaobod tuman elektr tarmog‘i korxonasi ishchilaridan biri iste’molchining 1,2 million so‘m qarzini “yopish” uchun 700 ming so‘m pul oldi. Tekshiruv chog‘ida u bunday noqonuniy harakatlarni yana 417 marta amalga oshirib, davlatga 31,3 million so‘m zarar yetkazgani aniqlandi.