Turkiya shimoli-g‘arbidagi Tekirdag‘ viloyati politsiyasi muxolifatchi diniy ulamo Fatxulloh Gulenning FETO tashkilotiga aloqadorlikda gumon qilingan 115 kishini hibsga oldi. Bu haqda “Gazeta.ru” xabar bermoqda.
Xabar berishlaricha, gumon ostida qo‘lga olinganlar orasida tadbirkorlar, uy bekalari va politsiyachilar bor. Ular mamlakatda bir yil avval yuz bergan davlat to‘ntarishiga urinish qatnashchilari ishlatgan ByLock messenjeridan foydalanganlikda ayblanmoqda.
Taxminlarga ko‘ra, ByLock dasturi davlat to‘ntarishiga urinish yuz berguniga qadar turk maxsus xizmatlari tomonidan buzib kirilgan, shu sababli ham to‘ntarishga urinish qatnashchilari keyinchalik WhatsApp messenjeridan foydalanishga o‘tgan.
Turkiya hukumati ma’lumotlariga ko‘ra, 2016-yil iyulida yuz bergan davlat to‘ntarishiga urinish mamlakatda terrorchilik guruhi deb tan olingan Fethullahist (FETO) tashkiloti tomonidan tashkil etilgan.
Avvalroq Turkiya prezidenti Rajab Toyyib Erdo‘g‘on mamlakat dushmanlarining “boshlarini uzib olishga” va’da bergan edi.
Izoh (0)