O‘zbekiston Respublikasi Prezidentining 2017-yil 15-fevraldagi “Pul muomalasini yanada takomillashtirish va bank plastik kartochkalaridan foydalangan holda hisob-kitoblarni rivojlantirish chora-tadbirlari to‘g‘risida”gi PQ-2777-sonli qaroriga muvofiq, 2017-yilning 1-martidan boshlab chakana savdo va aholiga pullik xizmatlar ko‘rsatish sohasidagi tadbirkorlik sub’ektlari, shu jumladan, yakka tartibdagi tadbirkorlar aholidan to‘lovlarni plastik kartochkalar yordamida qabul qilinishini ta’minlaydigan, o‘rnatish majburiy bo‘lgan hisob-kitob terminallarini o‘rnatmagan taqdirda o‘z faoliyatlarini amalga oshirish huquqiga ega bo‘lmasliklari belgilab qo‘yildi. Bu haqda Davlat soliq qo‘mitasi Axborot xizmati xabar bermoqda.
Agar chakana savdo va xizmatlar ko‘rsatish sohasidagi tadbirkorlik subyektlari sotilayotgan tovarlar narxini hamda ko‘rsatilayotgan xizmatlar haqini naqd pul mablag‘lari yoki plastik kartochkalar bo‘yicha to‘lash shakliga qarab sun’iy ravishda oshirgan yoki pasaytirgan taqdirda ularga nisbatan eng kam ish haqining 30 baravari miqdorida jarima solinishi belgilab qo‘yildi.
Shuningdek, davlat soliq xizmati organlari tomonidan tadbirkorlik subyektlarini naqd pul mablag‘lari yoki plastik kartochkalar bo‘yicha to‘lov shakliga qarab narxlarni sun’iy ravishda oshirish yoki pasaytirish, nazorat-kassa mashinalarini, hisob-kitob terminallarini ishlatish, shuningdek, o‘rnatilgan tartibda talon va cheklar berish, naqd pul tushumni o‘z vaqtida va to‘la hajmda inkassatsiya qilish masalalari yuzasidan o‘tkaziladigan tekshiruvlar, belgilangan tartibga muvofiq, nazorat organlari faoliyatini muvofiqlashtirish bo‘yicha Respublika kengashining maxsus ruxsatnomasini talab etadigan soliq tekshiruvi hisoblanmasligi qayd etib o‘tildi.
Afsuski, bu borada hududiy davlat soliq inspeksiyalari xodimlari tomonidan tadbirkorlik subyektlari o‘rtasida muntazam ravishda targ‘ibot-tashviqot, tushuntirish, ogohlantirish ishlarining olib borilishiga qaramasdan, ular orasida belgilangan savdo qoidalariga rioya qilmayotgan “ishbilarmonlar” ham uchrab turibdi.
Jumladan, joriy yilning 1-iyul holatiga ko‘ra, Qashqadaryo viloyatida faoliyat ko‘rsatayotgan 802 ta shoxobchada o‘tkazilgan nazorat tadbiri chog‘ida ularning barchasida savdo qoidalarining buzilishi holatlari aniqlandi.
Tekshirishlar natijasida nazorat-kassa mashinasidan foydalanmasdan 188,7 million so‘mlik savdo amalga oshirilganligi, 32 ta holatda 8,7 million so‘m savdo va xizmat ko‘rsatishdan tushgan naqd pul mablag‘ini bank kassalariga topshirmaslik hamda 6 million so‘mlik sifat sertifikatiga ega bo‘lmagan mahsulotlarni sotish holatlari aniqlandi.
Fuqarolar murojaati asosida o‘tkazilgan nazorat tadbirida Yakkabog‘ tumanida faoliyat ko‘rsatib kelayotgan yakka tartibdagi tadbirkor N.J.ga qarashli savdo do‘konida shoxobchada xaridorga 40 ming so‘mga nazorat-kassa mashinasi cheki berilmaganligi aniqlandi. Shuningdek, shoxobcha g‘aznasida nazorat-kassa mashinasi xotirasiga kirim qilinmagan 429 ming so‘m naqd pul borligi ma’lum bo‘ldi.
Bundan tashqari fuqarolar murojaati asosida o‘tkazilgan nazorat tadbirida Shahrisabz tumanida faoliyat ko‘rsatib kelayotgan yakka tartibdagi tadbirkor E.K.ga qarashli shoxobchada tadbirkor 22 ming so‘mlik sotib olingan mahsulot uchun nazorat-kassa mashinasi cheki bermaganligi hamda shu kuni nazorat-kassa mashinasi xotirasiga kirim qilinmagan 595 ming 500 so‘m naqd pulning borligi ma’lum bo‘ldi.
Shuningdek, Koson tumanida faoliyat ko‘rsatib kelayotgan yakka tartibdagi tadbirkor A.X.ga qarashli savdo do‘konida sotuvchi tomonidan xaridorga 15 ming so‘mga nazorat-kassa mashinasi cheki berilmaganligi, shoxobcha g‘aznasida nazorat-kassa mashinasi xotirasiga kirim qilinmagan 125 ming so‘m naqd pul borligi aniqlandi.
Bunday holatni Mirishkor tumanida ham uchratish mumkin. Tumanda faoliyat ko‘rsatib kelayotgan yakka tartibdagi tadbirkor S.K.ga qarashli savdo do‘konida tadbirkor tomonidan xaridorga 4 ming 500 so‘mga nazorat-kassa mashinasi cheki berilmaganligi aniqlandi. Shuningdek, shoxobcha g‘aznasida nazorat-kassa mashinasi xotirasiga kirim qilinmagan 1 million 200 ming so‘m miqdoridagi naqd pulning borligi ma’lum bo‘ldi.
O‘tkazilgan nazorat tadbirlari davomida yuqoridagi holatlar yuzasidan 686 ta xo‘jalik yurituvchi subyektiga nisbatan 3107,8 million so‘m miqdorida moliyaviy jarima qo‘llanildi.
Aniqlangan qoidabuzarliklar bo‘yicha to‘plangan materiallardan 685 ta holatda qoidabuzarliklarga yo‘l qo‘ygan shaxslarga nisbatan 205,2 million so‘m miqdorida ma’muriy jarima qo‘llanilib, 2 nafar shaxsga nisbatan to‘plangan hujjatlar chora ko‘rish uchun tegishli sud organlariga taqdim etildi.
Izoh (0)