Hayot uchun kurashayotgan qashqadaryolik Muhammadjon va bir-biriga zid ma’lumotlar. Haqiqat qayerda?

6-iyul kuni qashqadaryolik chaqaloq Muhammadjon Rashidov haqida uning buvisi — Nargiza Qurbonova tilidan bayonot e’lon qilingan edi. 14-may kuni tug‘ilgan chaqaloq 28-iyun kuni Qashqadaryo viloyat bolalar ko‘p tarmoqli tibbiyot markazida operatsiya qilingan, operatsiyadan so‘ng “vafot etgan” deb yaqinlariga topshirilgan, janozasi vaqtida esa “jonlangan”. So‘ng shu kunning o‘zida kasalxonaga qaytarib olib kelinib, internetda bu haqda ma’lum bo‘lguniga qadar sharoitlari yetarli bo‘lmagan palatada parvarishlangan.

Muhammadjonning ahvoli

Chaqaloqning ahvoli hali ham og‘ir, lekin yaxshi yangiliklar ham bor — uning harorati tushgan, sut, chaqaloqlar uchun mo‘ljallangan yeguliklarni tanovul qila boshlagan. Eng asosiysi, operatsiyadan keyingi 12 sutkadan buyon uning hayoti saqlab qolinmoqda. Shifokorlarning aytishicha, bu juda katta ko‘rsatkich.

Muhammadjon bilan bog‘liq vaziyat OAV va internetda ma’lum qilinganidan so‘ng (6-iyuldan boshlab), u to‘liq ta’minotga olingan. Chaqaloq Qashqadaryo viloyat bolalar ko‘p tarmoqli tibbiyot markazining alohida xonasiga ko‘chirilgan, bir shifokor, bir hamshira va bir sanitar biriktirilgan.

Bundan tashqari, chaqaloqqa yordam ko‘rsatish maqsadida O‘zbekistonning boshqa hududlaridan ham shifokorlar chaqirilgan. Muhammadjonning buvisi Nargiza Qurbonovaning “Daryo”ga ma’lum qilishicha, shu kunlarda Toshkentdan professor kelishi kutilmoqda.

Chaqaloqqa yordam berish uchun Samarqand viloyat bolalar ko‘p tarmoqli tibbiyot markazidan kelgan, o‘z vaqtida Germaniyada malaka oshirib qaytgan neonatalogiya mutaxassisi ahvoli Muhammadjonniki kabi bolalarni uzog‘i bilan 9 kungacha saqlab tura olganini aytgan. Bu haqda Muhammadjonning ahvolini doimiy ravishda nazorat qilib turgan shifokor Isroil Meliyev “Daryo”ga ma’lum qildi.

Uning so‘zlariga ko‘ra, Muhammadjonning holati yuzasidan u nafaqat O‘zbekiston, balki Rossiyadagi hamkasblari bilan ham maslahatlashgan. “Ular ham barchasini to‘g‘ri qilyapsizlar, kutish kerak, deb aytishdi”, — deydi shifokor.

“9-iyul kuni kechasi navbatchi edim. Chaqaloq sutka davomida qariyb 50 gramm sut ichdi, bir marta bezovta bo‘ldi. Agar bolani 18 sutkagacha ushlab tura olsak, shundan so‘ng u yengil nafas olishni boshlashi mumkin”, — deydi Isroil Meliyev.

Nargiza Qurbonova nevarasiga erta-yu kech qarayotgan Isroil Meliyev va Ilhom Ro‘ziyevga minnatdorchilik bildirarkan, o‘z kasbiga sodiq, vazifasiga sidqidildan yondashadigan shunday shifokorlar borligi uchun ham Muhammadjonning ahvoli o‘nglanib borayotganini ta’kidladi.

Vaqt masalasidagi nomuvofiqliklar

Muhammadjon Rashidov bilan bog‘liq vaziyat yuzasidan O‘zbekiston Sog‘liqni saqlash vazirligi hozirgacha faqat bir marta — 7-iyul kuni Qashqadaryo viloyat sog‘liqni saqlash boshqarmasi boshlig‘i To‘lqin Rasulovning axborotini e’lon qildi.

Qayd etish joiz, Muhammadjon Rashidov voqeasi chaqaloqni operatsiya qilgan shifokorlar bolani vafot etdi, deb onasi va buvisiga topshirgani, so‘ng Muhammadjon janozasi vaqtida “jonlangani” bilan bog‘liq hodisa sabab shov-shuvga aylanib ketgan edi.

To‘lqin Rasulov axborotida mazkur vaziyatga qisqacha: “Bola vafot etgan emasdi, u tirik bo‘lgan”, deb izoh berilgan. Shu bilan birga, vazirlikning rasmiy axborotida chaqaloqning operatsiyasi 18:50 da tugagani, chaqaloq 19:30 da shifoxonadan olib ketilgani, 22:30—23:00 larda qaytarib olib kelingani aytilgan.

Biroq Sog‘liqni saqlash vazirligi keltirilgan voqea soatlari bilan bevosita hodisa guvohi bo‘lgan fuqarolarning bildirgan ma’lumotlari o‘rtasida nomuvofiqliklar, ziddiyatlar yuzaga kelmoqda.

Xususan, janozada bo‘lgan Qarshi tumani Quyi Beshkent jome’ masjidi imom-xatibi chaqaloqning hali tirik ekani shom namozi arafasida ma’lum bo‘lganini, voqeadan xabardor shifokorlardan biri esa chaqaloq soat 22:00 bo‘lmay shifoxonaga qaytarib olib kelinganini “Daryo”ga ma’lum qildi.

Xulosa o‘rnida

Muhammadjon Rashidov va u bilan bog‘liq hodisa ayni vaqtda jamoatchilik diqqat markazida turibdi. Ijtimoiy tarmoqlarda bolakayga yaxshi niyatlar bilan “Hayotbek”, “O‘lmasjon” kabi yangi ismlar ham berilgan. Deyarli barcha chaqaloqning sog‘ayib, oyoqqa turib ketishini tilamoqda. Ayni vaqtda, vaziyatga to‘la oydinlik kiritishni so‘rayotganlar, aybdorlar jazolanishini talab qilayotganlar ham talaygina. Chaqaloqning yaqinlari o‘z kechmishini, sog‘liqni saqlash tizimi esa o‘z talqinini bayon etmoqda, asl haqiqat esa mana shu ikki nuqta o‘rtasida ekaniga shubha yo‘q.

“Daryo” internet-nashri tegishli vakolatli organlar, jumladan, O‘zbekiston Bosh prokuraturasidan vaziyatga oydinlik kiritish, asl haqiqatni yuzaga chiqarish maqsadida surishtiruv ishlarini olib borishni so‘rab qoladi.