6 июль куни қашқадарёлик чақалоқ Муҳаммаджон Рашидов ҳақида унинг бувиси — Наргиза Қурбонова тилидан баёнот эълон қилинган эди. 14 май куни туғилган чақалоқ 28 июнь куни Қашқадарё вилоят болалар кўп тармоқли тиббиёт марказида операция қилинган, операциядан сўнг «вафот этган» деб яқинларига топширилган, жанозаси вақтида эса «жонланган». Сўнг шу куннинг ўзида касалхонага қайтариб олиб келиниб, интернетда бу ҳақда маълум бўлгунига қадар шароитлари етарли бўлмаган палатада парваришланган.
Муҳаммаджоннинг аҳволи
Чақалоқнинг аҳволи ҳали ҳам оғир, лекин яхши янгиликлар ҳам бор — унинг ҳарорати тушган, сут, чақалоқлар учун мўлжалланган егуликларни тановул қила бошлаган. Энг асосийси, операциядан кейинги 12 суткадан буён унинг ҳаёти сақлаб қолинмоқда. Шифокорларнинг айтишича, бу жуда катта кўрсаткич.Муҳаммаджон билан боғлиқ вазият ОАВ ва интернетда маълум қилинганидан сўнг (6 июлдан бошлаб), у тўлиқ таъминотга олинган. Чақалоқ Қашқадарё вилоят болалар кўп тармоқли тиббиёт марказининг алоҳида хонасига кўчирилган, бир шифокор, бир ҳамшира ва бир санитар бириктирилган.
Мавзуга доир: Қашқадарёлик Муҳаммаджон кондиционерли палатага ўтказилган, унга «аввалгидан яхши қарашмоқда»
Чақалоққа ёрдам бериш учун Самарқанд вилоят болалар кўп тармоқли тиббиёт марказидан келган, ўз вақтида Германияда малака ошириб қайтган неонаталогия мутахассиси аҳволи Муҳаммаджонники каби болаларни узоғи билан 9 кунгача сақлаб тура олганини айтган. Бу ҳақда Муҳаммаджоннинг аҳволини доимий равишда назорат қилиб турган шифокор Исроил Мелиев «Дарё»га маълум қилди.
Унинг сўзларига кўра, Муҳаммаджоннинг ҳолати юзасидан у нафақат Ўзбекистон, балки Россиядаги ҳамкасблари билан ҳам маслаҳатлашган. «Улар ҳам барчасини тўғри қиляпсизлар, кутиш керак, деб айтишди», — дейди шифокор.
«9 июль куни кечаси навбатчи эдим. Чақалоқ сутка давомида қарийб 50 грамм сут ичди, бир марта безовта бўлди. Агар болани 18 суткагача ушлаб тура олсак, шундан сўнг у енгил нафас олишни бошлаши мумкин», — дейди Исроил Мелиев.
Наргиза Қурбонова неварасига эрта-ю кеч қараётган Исроил Мелиев ва Илҳом Рўзиевга миннатдорчилик билдираркан, ўз касбига содиқ, вазифасига сидқидилдан ёндашадиган шундай шифокорлар борлиги учун ҳам Муҳаммаджоннинг аҳволи ўнгланиб бораётганини таъкидлади.
Вақт масаласидаги номувофиқликлар
Муҳаммаджон Рашидов билан боғлиқ вазият юзасидан Ўзбекистон Соғлиқни сақлаш вазирлиги ҳозиргача фақат бир марта — 7 июль куни Қашқадарё вилоят соғлиқни сақлаш бошқармаси бошлиғи Тўлқин Расуловнинг ахборотини эълон қилди.Қайд этиш жоиз, Муҳаммаджон Рашидов воқеаси чақалоқни операция қилган шифокорлар болани вафот этди, деб онаси ва бувисига топширгани, сўнг Муҳаммаджон жанозаси вақтида «жонлангани» билан боғлиқ ҳодиса сабаб шов-шувга айланиб кетган эди.
Тўлқин Расулов ахборотида мазкур вазиятга қисқача: «Бола вафот этган эмасди, у тирик бўлган», деб изоҳ берилган. Шу билан бирга, вазирликнинг расмий ахборотида чақалоқнинг операцияси 18:50 да тугагани, чақалоқ 19:30 да шифохонадан олиб кетилгани, 22:30—23:00 ларда қайтариб олиб келингани айтилган.
Бироқ Соғлиқни сақлаш вазирлиги келтирилган воқеа соатлари билан бевосита ҳодиса гувоҳи бўлган фуқароларнинг билдирган маълумотлари ўртасида номувофиқликлар, зиддиятлар юзага келмоқда.
Хусусан, жанозада бўлган Қарши тумани Қуйи Бешкент жоме’ масжиди имом-хатиби чақалоқнинг ҳали тирик экани шом намози арафасида маълум бўлганини, воқеадан хабардор шифокорлардан бири эса чақалоқ соат 22:00 бўлмай шифохонага қайтариб олиб келинганини «Дарё»га маълум қилди.
Хулоса ўрнида
Муҳаммаджон Рашидов ва у билан боғлиқ ҳодиса айни вақтда жамоатчилик диққат марказида турибди. Ижтимоий тармоқларда болакайга яхши ниятлар билан «Ҳаётбек», «Ўлмасжон» каби янги исмлар ҳам берилган. Деярли барча чақалоқнинг соғайиб, оёққа туриб кетишини тиламоқда. Айни вақтда, вазиятга тўла ойдинлик киритишни сўраётганлар, айбдорлар жазоланишини талаб қилаётганлар ҳам талайгина. Чақалоқнинг яқинлари ўз кечмишини, соғлиқни сақлаш тизими эса ўз талқинини баён этмоқда, асл ҳақиқат эса мана шу икки нуқта ўртасида эканига шубҳа йўқ.«Дарё» интернет-нашри тегишли ваколатли органлар, жумладан, Ўзбекистон Бош прокуратурасидан вазиятга ойдинлик киритиш, асл ҳақиқатни юзага чиқариш мақсадида суриштирув ишларини олиб боришни сўраб қолади.
Изоҳ (0)