Qashqadaryolik salkam ikki oylik chaqaloq Muhammadjon Rashidov bilan bog‘liq hodisa bahs-munozaralarga sabab bo‘ldi. O‘z navbatida, 7-iyul kuni davomida “Daryo” internet-nashri tahririyatiga bolakayning sog‘ayib ketishi yo‘lida yordam berish niyatidagi ko‘plab fuqarolar qo‘ng‘iroq qilib, chaqaloqning oilasi bilan bog‘lanish uchun aloqa ma’lumotlarini so‘radi.
Shuningdek, shu kuni Sog‘liqni saqlash vazirligi matbuot xizmati vaziyat yuzasidan Qashqadaryo viloyat sog‘liqni saqlash boshqarmasi boshlig‘i To‘lqin Rasulovning axborotini e’lon qildi. Unda ta’kidlanishicha, chaqaloq onasi Shahnoza Hamidova va buvisi Nargiza Qurbonovaga topshirilish vaqtida buvisi aytganidek “vafot etgan emasdi, u tirik bo‘lgan”.
Vazirlik axborotida ta’kidlanishicha, Muhammadjon Rashidovning operatsiyasi 17:00 da boshlanib, 18:50 gacha davom etgan. 19:30 da, “shifokorlarning ruxsat bermasligiga qaramay, tilxat asosida” chaqaloqni uyga olib ketishgan. “Bemor shifoxonadan olib ketilgan kunning o‘zidayoq soat 22:30—23:00 oralig‘ida tibbiyot markaziga qaytarib olib kelingan”, — deyiladi rasmiy axborotda.Nevarasi mayit yuvuvchining qo‘lida “jonlangani”ni bildirgan Nargiza Qurbonova vazirlik axborotiga munosabat bildirarkan, unga operatsiyada qatnashgan barcha shifokorlar nevarasi vafot etganini va uni olib ketish kerakligini aytganini, shu vaqtda undan tilxat yozib berishni so‘rashganini ma’lum qildi. Uning aytishicha, shifokorlar operatsiyadan so‘ng unga: “Nevarangiz biroz bo‘lsa ham nafas olib turganida edi, uni reanimatsiyaga o‘tkazardik”, deb aytgan.
Mavzuga doir: Mayit yuvuvchining qo‘lida “jonlangan” bir yarim oylik go‘dak. Qashqadaryolik Muhammadjonning hayoti saqlab qolinadimi?
Men o‘z nevaramga dushman emasman-ku! Tirik desa, qanday qilib uyga olib ketardim?! Tirik bo‘lsa, qarindoshlarni to‘plab, go‘r qazdirib, mayit yuvuvchini chaqirib o‘tiramanmi? ‘Vafot etdi, harakatingizni qiling’, degani uchun olib ketdim. Tilxat yozdirib olishdi. Operatsiyadan avval ham tilxat yozdirib olishgan edi.Mutaxassislarning ta’kidlashicha, tibbiyot muassasalari davolanish jarayonida vafot etgan shaxsning jasadini olib ketuvchilardan tilxat olib qolmaydi. Boz ustiga, kasalxonada vafot etgan shaxslarning jasadini topshirish jarayoni ham oddiy emas — bemor aynan qanday sabab bilan vafot etganini aniqlash maqsadida jasad yorilib, ekspertizadan o‘tkaziladi.Nargiza Qurbonova, Muhammadjon Rashidovning buvisi
Ayni vaqtda, sud-tibbiy ekspertiza sohasi vakillarining qayd etishicha, diniy urf-odatlar, marosimlar bilan bog‘liq sabablar tufayli jasad yorilishining oldini olish maqsadida marhumning qarindoshlari tomonidan tilxat yozib berish holatlari ham uchrab turadi (“Og‘ir ahvolda, qarindoshlarining qat’iy talabiga ko‘ra kasalxonadan chiqarildi” mazmunida).
Nargiza Qurbonovaning qo‘shimcha qilishicha, internetda uning murojaati e’lon qilinganidan so‘ng, nevarasi kasalxonaning konditsionerli palatasiga o‘tkazilgan (murojaatda nevarasi na konditsioneri, na ventilyatori bor xonada yotgani, operatsiya qilingan joylari “qizarib, gazak olgani” aytilgan edi), shifokorlar ham Muhammadjonga “avvalgi kunlarga nisbatan yaxshi qarashmoqda”.
Muhammadjon Rashidovning oila a’zolari vaziyatga bee’tibor bo‘lmagan va ularni qo‘llab-quvvatlagan barchaga minnatdorchilik izhor qildi.