Ўзбекистон бош вазири Абдулла Арипов Хитой қишлоқ хўжалик вазири Хань Чанфу билан музокаралар олиб борди. Бу ҳақда UzDaily хабар бермоқда.
Вазир Ўзбекистон ҳукумати раҳбарига Хитой Давлат кенгаши бош вазири Ли Кэцяннинг саломини етказди ва унинг ташрифи икки давлат етакчилари келишувларини ҳаётга татбиқ этиш ҳамда аграр соҳада ўзаро ҳамкорликни илгари суришга қаратилганини билдирди.
«Ўзбекистон ва Хитой қишлоқ хўжалиги ҳамда унинг маҳсулотлари савдосига инвестициялар борасида ҳамкорликни кенгайтириши лозим. Томонлар агросаноат парклари қурилишига эътибор қаратиши ва халқаро чорвачилик зонаси яратиш масаласини ўрганиб чиқиши фойдадан холи бўлмайди. Шунингдек, аграр фанлар ва технологиялар соҳасидаги алоқаларни мустаҳкамлаш, икки давлат қишлоқ хўжалиги тараққиёти учун технологик қўллаб-қувватлаш ва бозорларни таъминлаб бериш зарур», — таъкидлади Хань Чанфу.
Абдулла Арипов Ўзбекистон ҳукумати қишлоқ хўжалигини ривожлантиришга алоҳида эътибор қаратаётгани ва бу борада Хитой тажрибасини ўрганиш режалаштирилганини айтиб ўтди. Ўзбекистон Хитой билан қишлоқ хўжалик маҳсулотларини қайта ишлаш, пахтачилик, экинларни суғориш, ипакчилик, қишлоқ хўжалиги маҳсулотлари экспорти ва фермерлар даромадини ошириш йўналишларида ҳамкорликни мустаҳкамлаш ниятида эканлигини билдирди.
Изоҳ (0)