Gollandiya apellyatsiya sudi mamlakat 1995-yilgi Srebrenitsa genotsidi chog‘ida 300 nafar bosniyalik musulmonning o‘ldirilishi uchun qisman javobgarligi haqida hukm chiqardi. Bu haqda, AFP’ga asoslanib, “TASS” xabar bermoqda.
Qarorni sudya Gepke Dulek o‘qib eshittirdi.
Qarorda aytilishicha, Gollandiya davlati qonunga zid harakat qilgan va shu bois qurbonlarning oilalariga tovon puli to‘lashi lozim. Ta’kidlanishicha, golland askarlari shu hududdagi bazani tark etsa, musulmonlar bosniyalik serblar qurboniga aylanishi mumkinligini bilgan holda ularni himoya qilish uchun hech narsa qilmagan.
Shu tariqa, apellyatsiya sudi 2014-yili Oliy sud chiqargan hukmni tasdiqladi.
1991–1995-yillarda Srebrenitsa qishlog‘i bosniyalik musulmonlarning tayanch nuqtasiga aylangan edi. 1995-yil iyulining boshida general Ratko Mladich boshchiligidagi bosniyalik serblar armiyasi anklavni qo‘lga olib, 8 ming nafar musulmonni qirib tashladi. BMT shafeligida harakat qilgan golland askarlari fojianing oldini ololmadi.
Srebrenitsa genotsidi Yugoslaviya urushining eng qonli sahifasi hisoblanadi.
Izoh (0)