Голландия апелляция суди мамлакат 1995 йилги Сребреница геноциди чоғида 300 нафар босниялик мусулмоннинг ўлдирилиши учун қисман жавобгарлиги ҳақида ҳукм чиқарди. Бу ҳақда, AFP’га асосланиб, «ТАСС» хабар бермоқда.
Қарорни судья Гепке Дулек ўқиб эшиттирди.
Қарорда айтилишича, Голландия давлати қонунга зид ҳаракат қилган ва шу боис қурбонларнинг оилаларига товон пули тўлаши лозим. Таъкидланишича, голланд аскарлари шу ҳудуддаги базани тарк этса, мусулмонлар босниялик серблар қурбонига айланиши мумкинлигини билган ҳолда уларни ҳимоя қилиш учун ҳеч нарса қилмаган.
Шу тариқа, апелляция суди 2014 йили Олий суд чиқарган ҳукмни тасдиқлади.
1991–1995 йилларда Сребреница қишлоғи босниялик мусулмонларнинг таянч нуқтасига айланган эди. 1995 йил июлининг бошида генерал Ратко Младич бошчилигидаги босниялик серблар армияси анклавни қўлга олиб, 8 минг нафар мусулмонни қириб ташлади. БМТ шафелигида ҳаракат қилган голланд аскарлари фожианинг олдини ололмади.
Сребреница геноциди Югославия урушининг энг қонли саҳифаси ҳисобланади.
Изоҳ (0)