Qozog‘iston poytaxti Ostonadagi EXPO-2017 xalqaro ko‘rgazmasining ilk kunlaridayoq O‘zbekiston pavilyoni eng ko‘p tashrif buyurilgan pavilyonlar o‘nligiga kirdi. Bu haqda mahalliy OAVlar xabar berdi. Vakillarimiz so‘zlariga ko‘ra, ikki hafta ichida o‘zbek ekspozitsiyasini 100 mingdan ziyod kishi tomosha qilgan.
Birinchi navbatda, nanotexnologiyalar qo‘llangan ishlanmalar qiziqish uyg‘otdi. Bular elektromobil, bioyoqilg‘i va vodorodda yuruvchi avtomobillar, ekokapsula, o‘z-o‘zini quvvatlovchi smartfon va boshqalar. “Daryo” vakilining turli mamlakatlardan kelgan suhbatdoshlari ta’kidlaganidek, O‘zbekiston pavilyoni o‘zining kutilmagan takliflari bilan hayratda qoldirgan.
Eslatib o‘tamiz, EXPO-2017 xalqaro ko‘rgazmasining tantanali ochilish marosimi 9-iyun kuni bo‘lib o‘tgan edi. Marosimda O‘zbekiston Respublikasi Prezidenti Shavkat Mirziyoyev ishtirok etdi.
Keyinroq EXPO-2017 ko‘rgazmasining O‘zbekiston pavilyonida quyosh batareyasida ishlovchi biomobil taqdim etilgani, uning bir quvvatlantirilishi 700 kilometr masofa bosib o‘tishga yetishi xabar berilgan edi.
Izoh (0)