18-iyun kuni 110-maktabda Toshkentdagi barcha o‘rta umumta’lim maktablarining direktorlari ishtirokida yig‘ilish bo‘lib o‘tdi, deb yozadi “Uznews.uz”. Yig‘ilish O‘zbekiston Prezidentining davlat maslahatchisi Ahmadhoji Yunusxo‘jayev, shuningdek, Xalq ta’limi vaziri Ulug‘bek Inoyatov raisligida o‘tkazildi.
O‘tkazilgan so‘rovning dastlabki natijalariga ko‘ra, ko‘pchilik ota-onalar o‘z farzandlarini 10—11-sinflarda o‘qitish istagini bildirdi. Endi Toshkent maktablariga 10—11-sinflar qaytariladi, deb yozadi nashr. “Daryo” manbasi ma’lum qilishicha, ushbu masala hozircha muhokama qilinmoqda.
Yig‘ilishda 10—11-sinf o‘quvchilarini darsliklar bilan ta’minlash masalasi ko‘tarildi.
Shuningdek, 10—11-sinf o‘quvchilari uchun amaliyot tizimi joriy qilinadi, ya’ni ular maktab dasturi bo‘yicha to‘rt kun o‘qitiladi, yana ikki kun davomida esa ular tanlangan mutaxassislik bo‘yicha amaliyot o‘taydi. Maktabni bitirgach, o‘quvchilarga shahodatnoma hamda kasbni o‘zlashtirganlik to‘g‘risida diplom beriladi, deyiladi xabarda.
Nashr ta’kidlashicha, shu yilning sentabridan o‘rta umumta’lim maktablari o‘rta maktablar deb atala boshlaydi.
Tadbirda shuningdek, kollej va litseylarning 2—3-kurs o‘quvchilari diplom olguniga qadar ta’limni davom ettirishi aytib o‘tildi.
Eslatib o‘tamiz, 18-iyun kuni Toshkentdagi o‘rta umumta’lim maktablarida 2017-yilda 9-sinfni bitirgan o‘quvchilarning ota-onalari o‘rtasida so‘rov tashkil qilindi. So‘rovnomada har bir ota-ona taklif qilingan javoblardan birini tanlashi, ya’ni 10—11-sinflarni joriy etish borasida rozilik yoki rad javobi berishi kerak bo‘ldi.
Izoh (0)