Oyatulloh Xomanaiy AQSh terrorchilik bilan kurashayotganligi haqidagi da’voni yolg‘on deb atadi

Qo‘shma Shtatlar terrorizm bilan kurash olib borayotgani haqidagi da’vo yolg‘ondan iborat. Bu haqda Eron diniy yetakchisi oyatulloh Ali Xomanaiy ma’lum qildi, deya xabar beradi “TASS”.

“AQSh aksilterror koalitsiyasini tuzgani haqidagi da’vo yolg‘on. IShIDni chindan ham yo‘q qilishni istaganlar unga shunday ham qarshilik ko‘rsatmoqda”, — dedi oyatulloh.

Xomanaiy Vashington tomonidan Eronga nisbatan bildirilgan mintaqadagi vaziyatni beqarorlashtirish bo‘yicha ayblovlarga ham munosabat bildirdi.

“Avvalo bunday aylovlarni bildirayotganlarning mintaqaga hech qanday aloqasi yo‘q. Qolaversa, aynan ularning o‘zi harakatlari bilan mintaqadagi vaziyatni izdan chiqarmoqda”, — ta’kidladi Ali Xomanaiy.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.