O‘zbekistonda gidroenergetikani rivojlantirish uchun jalb qilinadigan xorijiy kreditlar 1 milliard dollardan ortiq mablag‘ni tashkil qiladi. Bu haqda O‘zbekiston Respublikasi Prezidentining qarorida (PDF) qayd etilgan, deb xabar berdi “Gazeta.uz”.
Hujjat bilan 2017—2021-yillarda O‘zbekistonda gidroenergetikani rivojlantirish bo‘yicha chora-tadbirlar dasturi tasdiqlandi. Unda 18 ta gidroelektr stansiyasini qurish va mavjud 14 tasini modernizatsiya qilish belgilangan. Bu maqsadlarga umumiy 2,65 milliard dollar yo‘naltiriladi.
Hisob-kitoblarga ko‘ra, dasturning amalga oshirilishi 2026-yilga borib O‘zbekistonda GESlar quvvati 1,7 barobarga — 3,038 megavattga, elektr toki ishlab chiqishdagi gidroenergetika ulushi esa 12,7 foizdan 15,8 foizga ortadi.
Dasturlar O‘zbekistonning 1,64 milliard dollarlik mablag‘lari hamda xalqaro va xorijiy moliya institutlarining 1,009 milliard dollarlik kreditlari hisobidan moliyalashtiriladi.
Xususan, dasturlar doirasida Xitoy “Eksimbanki”ning 572,8 million dollar, Islom taraqqiyot bankining 181,1 million dollar, Osiyo infratuzilmaviy investitsiyalar bankining 77,3 million dollar, Osiyo taraqqiyot bankining 98,4 million dollarlik kreditlarini jalb qilish rejalashtirilgan.
Shuningdek, dastur doirasiga gidroenergetika sohasida 2030-yilga qadar realizatsiya qilinishi kerak bo‘lgan 1,7 milliard dollarlik 42 ta istiqbolli loyihalar ham kiritilgan.
Izoh (0)