Ўзбекистонда гидроэнергетикани ривожлантиришга 2,65 миллард доллар йўналтирилади

Ўзбекистонда гидроэнергетикани ривожлантириш учун жалб қилинадиган хорижий кредитлар 1 миллиард доллардан ортиқ маблағни ташкил қилади. Бу ҳақда Ўзбекистон Республикаси Президентининг қарорида (PDF) қайд этилган, деб хабар берди «Газета.uz».

Ҳужжат билан 2017—2021 йилларда Ўзбекистонда гидроэнергетикани ривожлантириш бўйича чора-тадбирлар дастури тасдиқланди. Унда 18 та гидроэлектр станциясини қуриш ва мавжуд 14 тасини модернизация қилиш белгиланган. Бу мақсадларга умумий 2,65 миллиард доллар йўналтирилади.

Ҳисоб-китобларга кўра, дастурнинг амалга оширилиши 2026 йилга бориб Ўзбекистонда ГЕСлар қуввати 1,7 баробарга — 3,038 мегаваттга, электр токи ишлаб чиқишдаги гидроэнергетика улуши эса 12,7 фоиздан 15,8 фоизга ортади.

Дастурлар Ўзбекистоннинг 1,64 миллиард долларлик маблағлари ҳамда халқаро ва хорижий молия институтларининг 1,009 миллиард долларлик кредитлари ҳисобидан молиялаштирилади.

Хусусан, дастурлар доирасида Хитой «Эксимбанки»нинг 572,8 миллион доллар, Ислом тараққиёт банкининг 181,1 миллион доллар, Осиё инфратузилмавий инвестициялар банкининг 77,3 миллион доллар, Осиё тараққиёт банкининг 98,4 миллион долларлик кредитларини жалб қилиш режалаштирилган.

Шунингдек, дастур доирасига гидроэнергетика соҳасида 2030 йилга қадар реализация қилиниши керак бўлган 1,7 миллиард долларлик 42 та истиқболли лойиҳалар ҳам киритилган.