Тошкент вилояти ИИБда «Жиноятчиликни олдини олиш ва профилактика куни» доирасида 1 июнь, пайшанба куни брифинг бўлиб ўтди. Брифингда Бўка туманида юз берган жиддий босқинчилик жинояти ҳақида маълум қилинди.
Бўка тумани ИИБга келиб тушган мурожаатга кўра, 2017 йил 23 февралдан 24 февралга ўтар кечаси, тунги соат 03:00 да тўрт нафар номаълум шахс туманда жойлашган «Даштобод» маҳалласидаги уйларнинг бирига дарвоза орқали ғайриқонуний равишда кирган. Бу шахслар уйнинг ётоқхонасида ухлаб ётган 1992 йилда туғилган У.Н.га ҳужум қилиб, пичоқ билан қўрқитган ва бош юз соҳаларига бир неча бор урган. Босқинчилар жабрланувчига тан жароҳати етказиб, ўзлари билан олиб келган скотч ёрдамида унинг қўл, оёқ ва ўгзини боғлаган.
Шундан сўнг номаълум шахслар уйда бўлган 5 миллион 300 минг сўм нақд пул, заргарлик буюмлари ва 700 минг сўмлик Samsung уяли телефонини қўлга киритиб, воқеа жойидан яширинган.
Олиб борилган суриштирувлар натижасида мазкур босқинчилик жинояти У.Н.нинг маҳалладоши 1974 йилда туғилган Улуғбек Эргашев томонидан уюштирилганлиги аниқланди. У ўзининг танишлари, 1980 йилда туғилган Абдуғаффор Ашуров, 1973 йилда туғилган Алексей Мугинов, 1978 йилда туғилган Улуғбек Ғозиев ва 1982 йилда туғилган Фарҳод Абдусаматов билан бирга жиноятни содир этган.
Хонадон эгасини ўзига тўқ яшашини, уйида 5—6 миллион сўм сақлашини айтиб, Улуғбек Эргашев ўз шерикларини қизиқтирган, уларга уйни кўрсатиб, қандай қилиб унга кириш кераклигини тушунтирган. Эътиборлиси шундаки, жиноятнинг ташкилотчиси ўз шерикларига У.Н. уйида 280 минг АҚШ доллари сақлашини айтган. Босқинчилар эса уй эгасидан ана шу пулни талаб қилган. Бундай миқдордаги пулнинг уйда йўқ эканлигини билган босқинчилар қўлга киритилган пул ва буюмлар билан чекланган.
Тергов ва тезкор суриштирувлар давомида гуруҳ аъзоларидан бири Фарҳод Абдусаматов 2017 йил 24 мартда Оҳангарон туманида содир этилган босқинчилик жиноятида ҳам иштирок этгани аниқланган.
Изоҳ (0)