Milliy matbuot markazida milliy kinematografiya san’atini yanada rivojlantirish borasida amalga oshirilayotgan ishlar va istiqboldagi rejalarga bag‘ishlangan matbuot anjumani bo‘lib o‘tdi. Bu haqda O‘zA xabar berdi.
“O‘zbekkino” milliy agentligi bosh direktori Otabek Musayev kinematografiya sohasini izchil rivojlantirish, uning xalq hayoti, ayniqsa, navqiron avlod tarbiyasidagi o‘rni va ta’sirini yanada kuchaytirishga alohida e’tibor qaratilayotganini ta’kidladi.
2017-yilning o‘tgan davri mobaynida davlat buyurtmasi asosida 4 ta badiiy, shuncha multiplikatsion, “Zumrasha” bolalar yumoristik kinojurnalining birinchi va ikkinchi soni, 17 ta hujjatli va ilmiy-ommabop filmlarni suratga olish ishlari boshlangan.
O‘tgan yili davlat buyurtmasiga asosan ishlab chiqarilgan “Xazonrezgi” badiiy filmi Rossiya kinoakademiyasining “Nika” mukofotiga MDH va Boltiqbo‘yi davlatlarining eng yaxshi badiiy filmi nominatsiyasi bo‘yicha nomzod b‘ldi.
Joriy yilda yosh kinoijodkorlar tomonidan suratga olingan qisqa metrajli filmlar III Respublika festivali — RROLogue o‘tkaziladi. Festivalda 35 yoshgacha bo‘lgan kinoijodkorlar so‘nggi ikki yil mobaynida suratga olgan qisqa metrajli badiiy filmlari bilan qatnashadi.
Slovakiya, Estoniya, Janubiy Koreya, Buyuk Britaniya, Gretsiya, Rossiya kabi davlatlarda o‘zbek kinosi kunlarini o‘tkazish bo‘yicha tashkiliy ishlar olib borilmoqda.
Izoh (0)