Prezident tashrifidan so‘ng Chilonzor tumanida ijarada yashovchi oilaga yangi xonadon berildi. Bu haqda O‘zA xabar bermoqda.
Shahnoza Qayumovaning oilasi yetti yildan buyon Chilonzorda ijara uyda yashab kelayotgandi. Shavkat Mirziyoyevning 12-aprel kuni Chilonzor tumaniga tashrifi Shahnoza va uning turmush o‘rtog‘i G‘anisher uchun bir olam quvonch olib keldi. Davlat rahbari shu kuni tumanning Yakkatut va Katta Xirmontepa mahallalari aholisi bilan muloqotda bo‘ldi va ularning yashash sharoiti bilan qiziqdi.
“Prezidentimiz Shavkat Mirziyoyevning mahallamizga kelgani ko‘nglimizni tog‘dek ko‘tardi, — dedi Shahnoza. — U kishining aholi bilan muloqoti har birimizga ruhiy madad, ishonch va ko‘tarinki kayfiyat baxsh etdi. Ayniqsa, bu uchrashuv bizning oilamiz uchun bir umrga unutilmas voqea bo‘lib qoladi. Prezidentimiz bilan suhbatda boshpanamiz yo‘qligini aytdik. Yurtboshimizning tashrifidan yigirma kun o‘tgach, Toshkent shahar hokimining qarori bilan Olmazor tumani Shifokorlar shaharchasidan bizga besh xonali xonadon ajratildi. Bu xushxabarni eshitgan farzandlarim va yaqinlarimning quvonchini ko‘rsangiz edi. Prezidentimizga oilamiz bilan bir umr ta’zimdamiz”.
Davlat rahbarining Chilonzor tumanida bo‘lishi, Katta Xirmontepa va Yakkatut mahallalari aholisi bilan muloqoti odamlarni ruhlantirib yubordi.
“Mahallamizdagi 1755 xonadonda 5600 dan ortiq aholi istiqomat qiladi, — deydi ‘Yakkatut’ mahalla fuqarolar yig‘ini raisi Nodirbek Ro‘zmetov. — Davlatimiz rahbari ko‘p qavatli uylarga xizmat ko‘rsatuvchi shirkatlar ishini yanada yaxshilash va xizmat ko‘rsatish sifatini oshirish bo‘yicha ko‘rsatmalar berdi. Bu boradagi ishlarning yechimi mutasaddilar tomonidan muhokama etildi va dastlabki natijalarga erishildi. ‘Boqiy kommunalchi’ xususiy uy-joy mulkdorlari shirkatiga 164 million so‘m kredit ajratilib, ayni chog‘da ko‘p qavatli uylar tomi, fasad qismi va yo‘laklar ta’mirlanayotir. Yangi mahalla markazi binosini barpo etish bo‘yicha sa’y-harakatlar boshlangan. Bundan tashqari, yig‘in faollari aholining turmush tarzi, oilaviy muhiti, tadbirkorlik bilan shug‘ullanuvchilar uchun bankdan kredit olish ishlarida ko‘mak berish, xotin-qizlar, yoshlarni har tomonlama qo‘llab-quvvatlash maqsadida uyma-uy kirib, ularning shart-sharoitlari, mavjud muammolarini o‘rganmoqda”.
Prezident mahallalar markazlarida choyxona, novvoyxona, go‘zallik salonlari, do‘konlar bunyod etish, zamonaviy sport va bolalar maydonchalari yaratish aholining dam olishi va hordiq chiqarishiga hamda ularning ahil-inoq yashashini ta’minlashga xizmat qilishini ta’kidladi.
Izoh (0)