Xabar qilinganidek, “O‘zavtosanoat” AK va Peugeot Citroen guruhi o‘rtasida O‘zbekistonda yengil tijorat avtomobillarini ishlab chiqaruvchi qo‘shma korxona barpo etish bo‘yicha kelishuv imzolandi. Mazkur yangilik Fransiya ommaviy axborot vositalarida ham keng yoritilmoqda, deya xabar beradi “Jahon” axborot agentligi.
Jumladan, LesEchos nashri “Jizzax” EIZda bunyod etiladigan Uzbekistan Peugeot Citroen Automotive qo‘shma korxonasi loyihasiga jalb etiladigan umumiy investitsiyalar hajmi 130 million yevro, nizom kapitali esa 30 million yevroni tashkil etilishini bildirdi.
Boursier.com PSA Peugeot Citroen guruhi tomonidan yangi texnologiyalar, intellektual mulkdan foydalanish, shuningdek, zamonaviy ishlab chiqarish liniyalari va xodimlarni o‘qitish imkoniyati taqdim etilishi haqida yozadi. Zavod ishlab chiqarishni boshqarish, mahsulot sifati, yetkazib berish va savdo masalalarida Peugeot Citroen’ning zamonaviy tizimi bo‘yicha ish olib boradi. Shu bilan birga, avtomobil ehtiyot qismlarini ishlab chiqaruvchi mahalliy korxonalarni jalb qilish yo‘li bilan birinchi yilning o‘zidayoq yangi qo‘shma korxonada 50 foiz mahalliy mahsulotlardan foydalanish ko‘zda tutilgan.
Tradingsat.com guruh vitse-prezidenti Kristof Berjeranning yangi loyiha haqidagi fikrlariga e’tibor qaratgan.
“Loyiha Push to Pass (5 yillik rivojlanish rejasi) strategik rejamizga to‘liq mos keladi. Bu PSA guruhi biznesining yengil tijoriy transport segmenti va mintaqada daromadni oshirish uchun ajoyib imkoniyat, — deydi Kristof Berjeran. — Peugeot Citroen qo‘shma korxona dunyoga kelishida asosiy omil bo‘lgan O‘zbekiston Prezidenti Shavkat Mirziyoyevning shaxsiy qo‘llab-quvvatlashi va o‘zbek sheriklari bilan o‘rnatilgan konstruktiv muloqotni yuqori baholaydi”.
Izoh (0)