Qozog‘istonlik talaba Ruslan Tulenov 2009-yildan beri Xitoydagi o‘qish davri davomida 5000 millilitr qon topshirdi. Bu haqda China Daily’ga tayanib, “Kazinform” xabar berdi.
Ruslan Tulenov Xitoy Xalq Respublikasi raisi Si Szinpinning 2013-yilda Qozog‘istonga tashrifi doirasida Nazarboyev universitetiga borgan mahal u haqida gapirganidan so‘ng mashhur bo‘lib ketdi. Ruslan xitoyliklar “panda qoni” deb ataydigan rezus-manfiy (odamlarning 15 foizida uchraydi) qonga ega. Si Szinpinning so‘zlariga ko‘ra, Ruslan ko‘plab xitoylik bemorlarga yordam bergan.
25 yoshli qozog‘istonlik bir yilda ikki marta qon topshiradi. Shu kungacha topshirgan qoni butun tanasidagi qon miqdoriga teng.
Ruslan Tulenov 2009-yilda Xitoy tilini Xaynan universitetida o‘rganishni boshlagan, keyinroq esa Pekin fan va texnologiya universitetiga o‘qishga kirgan.
“Bir do‘stim yilda ikki marotaba qon topshirishini aytganidan so‘ng, men ham qon topshira boshladim. Menda odamlarga yordam berish maqsadida qon topshirish istagi tug‘ildi. Bu men uchun muhim. Onam menga shunday tarbiya bergan”, — deydi Ruslan.
Xitoy raisining Qozog‘istonga tashrifidan so‘ng, Xaynan universiteti rahbariyati Ruslan Tulenovga Qozog‘iston va Xitoy aloqalarini mustahkamlashga qo‘shgan hissasi uchun 100 ming yuan (16 340 dollar) miqdorida pul mukofotini topshirdi.
Izoh (0)