GM Uzbekistan AJ Chevrolet Malibu sedanining yangilangan modelini yig‘ishni boshladi. Bu haqda “O‘zavtosanoat” AK xabar berdi.
Yangi rusumdagi Chevrolet Malibu bir qator afzalliklarga ega. Avvalgi avlod vakillariga nisbatan xavfsizlik va qulaylik ko‘rsatkichlari takomillashgan, anchagina tejamkor hamda texnologik model.
Avtomobil GM Uzbekistan AJning Toshkentdagi filialida yirik blokli yig‘ish usulida (SKD) ishlab chiqariladi.
Dizaynerlar Chevrolet Malibu yangi avlod modeli ustida ishlayotib, uning tashqi qiyofasiga ko‘proq agressiv ko‘rinish berishga intildi. Siniq chiziqlar va egilgan joylar sedanga g‘ayratlilik va o‘zgacha joziba baxsh etadi. Kuzovning yon qismlaridagi bo‘rtma shtampovkalar orqa qism bilan birgalikda ko‘p jihatdan Impala sedaniga o‘xshash, umuman olganda esa, kuzovning ko‘pchilik elementlari afsonaviy Camaro’ga o‘xshaydi. O‘zbekiston bozorida avtomobil to‘rt xil (sadaf-oq, oqish kulrang, to‘q kulrang va qora) rangda taqdim etiladi.
Avtomobil interyerida esa yangi uskunalar paneli va rul chambaragi paydo bo‘ldi. Markaziy konsol o‘rtasiga MyLink modelidagi 7 dyuymli Touch Screen ko‘ngilochar-axborot majmuasi joylashdi. Rul chambaragi ancha oldinga chiqarilgan, uning ortiga esa analogli datchiklari bo‘lgan bort kompyuteri yashiringan. Orqa o‘rindiqdagi yo‘lovchilar esa qo‘shimcha 33 mm bo‘sh joyga ega bo‘ldi va endi shovqindan izolyatsiyadan to‘liq qulaylikda bahramand bo‘lishi mumkin.
Yangi rusumdagi avtomobil, uning imkoniyatlari, tuzilishi hamda narxlari borasidagi to‘liq ma’lumot bilan ushbu havola orqali tanishishingiz mumkin.
Avvalroq GM Uzbekistan kompaniyasi butunlay yangilangan Chevrolet Malibu biznes-klass sedanini ishlab chiqara boshlashi xabar berilgan edi.
Izoh (0)