AQSh ilk bor “barcha bombalarning onasi”dan foydalandi. Uni IShIDning Afg‘onistondagi obyektlariga tashlashdi

AQSh Qurolli Kuchlari 13-aprel kuni Afg‘onistondagi IShID terrorchilari obyektlariga o‘zining eng qudratli aviabombasi — GBU-43/B’ni tashladi. Meduza’ning xabar berishicha, mazkur bombadan ilk bor jangovar sharoitda foydalanildi.

Xabar berishlaricha, ushbu qurol vositasida Afg‘oniston sharqidagi Nangarhor viloyatidagi terrorchilarning yerosti inshootlarini yo‘q qilish maqsad qilingan.

GBU-43/B’ning boshqa bir nomi ham bor — MOAB (Massive Ordnance Air Blast, portlovchi harakatli og‘ir o‘q-dori). Mazkur qisqartmani Mother of All Bombs, ya’ni, “barcha bombalarning onasi” deb ham ta’riflashadi.

GBU-43/B bombasi 2000-yillarning boshida ishlab chiqilgan bo‘lib, u AQSh Qurolli Kuchlari ixtiyoridagi eng kuchli noyadroviy bomba hisoblanadi. Bombaning og‘irligi 9,5 tonna, quvvati — trotil ekvivalentida 11 tonna.

Bir necha yildan so‘ng Rossiyada yuqori quvvatli vakuum aviabombasi ishlab chiqilgan bo‘lib (rasmiy nomi ma’lum qilinmagan), uni, shuningdek, “barcha bombalarning otasi” deb ta’riflashadi.

“Daryo”ning Telegram’dagi rasmiy kanali — @toshqindaryo’ga a’zo bo‘ling!