Hindistonning Panjob shtatidagi sud mahalliy fermer Sampuran Singxga undan qarzdor bo‘lgan temiryo‘l ma’muriyati tomonidan tovon sifatida yo‘lovchi poyezdi berilishi haqida hukm chiqardi. Bu haqda “TASS” xabar bermoqda.
Ma’lum qilinishicha, hukmga binoan 20 vagondan iborat yo‘lovchi poyezdi sudga murojaat qilgan fermerga qarzlar o‘rniga beriladi.
Sampuran Singx sudlashgan shtatning temiryo‘llar boshqarmasi bir necha yil oldin temiryo‘l tarmog‘ini qurish maqsadida fermerning yerini tortib olgan, biroq yer uchun to‘lanishi lozim bo‘lgan bir million rupiy (qariyb 15,3 ming dollar) berilmagan.
2015-yil Singx mazkur ishda yutib chiqdi, biroq temiryo‘l ma’muriyati puli yo‘qligini aytib, tegishli pulni to‘lamadi. Fermerning advokati joriy yilning yanvar oyida ishni yana bir bor sudga topshirdi va sudya poyezdning fermer hisobiga musodara qilinishi haqida hukm chiqardi.
17-mart kuni kechki payt Singx advokati va sud nozirlari bilan Ludhiana shahri vokzaliga kelib, kelayotgan poyezdni kutib turdi va uning mashinistiga poyezdni fermer hisobiga musodara qilish bilan bog‘liq hukmni ko‘rsatdi.
Singx mashinistga yo‘lovchilarni manziliga yetkazishi uchun yo‘nalish bo‘yicha reysni tugatishiga ruxsat berdi.
Temiryo‘l ma’muriyati yana ikki kun davomida, qarzni to‘lash uchun pul topguniga qadar ushbu poyezd tarkibidan foydalanib turish uchun uning yangi egasidan ruxsat oldi. Agar pul topilmasa, 20 vagonli poyezd kimoshdi savdoga qo‘yilishi mumkin.
Izoh (0)