7-fevral kuni Toshkentdagi Grand Mir (sobiq “Rossiya”) mehmonxonasi yaqinida joylashgan “Manas” art-restorani yonib ketgan edi. O‘zbekiston IIV axborotiga ko‘ra, “380 kvadrat metr maydonda o‘tov qilib qurilgan ayvon va jihozlar yongan”.
Bu yong‘in o‘sha kunning eng ko‘p muhokama qilingan voqealaridan biri bo‘ldi; bu haqda nafaqat O‘zbekiston nashrlari, qo‘shni mamlakatlarda, xususan, Qirg‘izistonda ham faol yozishdi (ma’lumot uchun, “Manas” — qirg‘iz xalqining “Alpomish”i).
“Ha, bu haqiqat, — deyiladi restoran 7-fevral kuni Facebook’dagi sahifasida e’lon qilgan xabarda. — Bizning sevimli Xonligimiz binosi yonib ketdi. HECH KIM JABRLANMADI va bu eng asosiysi! ‘Manas’ nafaqat bir bino, balki bu kulfat sabab jamlangan jamoa, oila hamdir. Binoni qayta qurish juda oson! Tez orada ochilish haqida e’lon qilamiz!”.
Yong‘in sabab restoran jamoasiga hamdardlik bildirganlar ham, bu muassasani “axloqi buzuqlar makoni bo‘lsa kerak” degan gumon bilan yong‘inni adolatli deb topganlar ham topildi. “Manas” ma’muriyati esa birinchi galda shu vaqtgacha “sodiqlik bonuslari”ni to‘plagan doimiy xo‘randalarini ovutishga urindi: “Bonuslaringizdan boshqa restoranlarda foydalanishingiz mumkin”.
Yong‘inning ertasiga esa restoran ma’muriyati Facebook foydalanuvchilarini kamida “o‘z optimizmi” bilan hayratda qoldirdi. Restoran yuz bergan baxtsiz hodisani “O‘z xonligingni qur!”, deb nomlangan “realiti-shou”ning bir qismiga aylantirdi. Yangi restoran qurilishi haqida esa hajvga to‘la videorolik tayyorladi. Unda boshlovchi yong‘inni “realiti-shouning birinchi kuni” deb ataydi va “bu shouni ‘Yoshlar’ telekanali namoyish etmaydi”, deb shukrona keltiradi.
11-fevral kuni “Manas” ikkinchi videorolikni e’lon qildi. Unda boshlovchi qurilish jarayoni qanday ketayotgani, unda kimlar ishtirok etayotgani haqida ma’lumot berishga urinadi. Shuningdek, bu videorolikda Murad Buildings qurilish kompaniyasi o‘z rahbari Murod Nazarov bilan birga suratga tushgan. Kompaniya, “Manas” ma’muriyati aytganidek, qurilishga “bebaho hissa” qo‘shgan.
“Manas”ning og‘ir kulfatdan keyingi bu ko‘tarinki videolari foydalanuvchilarni hayron qoldirgani bor gap. Ayni vaqtda, bu videolar e’lon qilinganidan so‘ng, ba’zi foydalanuvchilar yong‘in ataylab uyushtirilgan degan xayolga ham borgan. “Go‘yo o‘zlarini piar qilish uchun ataylab yong‘in uyushtirgandek! Barakalla, marketologlar!”, — deb yozgan bir foydalanuvchi. “Ajoyib piar-yurish va boshqa firmalarni reklama qilish uchun yaxshi bir kanal bo‘libdi. Yangi seriyalarini kutaman”, — deb ikkinchi videoga izoh qoldirgan boshqa bir foydalanuvchi.
“Manas” rahbariyati bu kabi yarim hazil, yarim chin kommentlarga yana ko‘tarinki kayfiyatda ritorik savol bilan javob qaytargan: “Har kuni odamlar bilan to‘la bo‘lgan va bizga moddiy foyda keltirib turgan restoranni qasddan yoqib yuborishimiz mumkin, deb o‘ylaysizmi?”. Va boshqa bir kommentda qo‘shimcha qilgan: “Ko‘magingiz uchun katta rahmat! Bizga hozir u juda ham kerak”.
Odamlar esa haqiqatan ham restoranga yordam bermoqda. Bir foydalanuvchining yozishicha, u yangi qurilayotgan restoranning bitta g‘ishtini 100 ming so‘mga sotib olishga qaror qilgan. Restoranda qurilishga yordam bergan kishilarning ismlari “Do‘stlik devori”ga yozib qo‘yilishi aytilmoqda. Shuningdek, restoran ma’muriyati ko‘rsatilgan yordamni depozit shaklida qaytarishni ham va’da qilmoqda.
Yong‘indan restoran qancha zarar ko‘rgani ma’lum emas. Yangi muassasaning qurilishi qachon yakuniga yetishi ham hozircha bildirilmagan.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)