7 февраль куни Тошкентдаги Grand Mir (собиқ «Россия») меҳмонхонаси яқинида жойлашган «Манас» арт-ресторани ёниб кетган эди. Ўзбекистон ИИВ ахборотига кўра, «380 квадрат метр майдонда ўтов қилиб қурилган айвон ва жиҳозлар ёнган».
Бу ёнғин ўша куннинг энг кўп муҳокама қилинган воқеаларидан бири бўлди; бу ҳақда нафақат Ўзбекистон нашрлари, қўшни мамлакатларда, хусусан, Қирғизистонда ҳам фаол ёзишди (маълумот учун, «Манас» — қирғиз халқининг «Альпомиш»и).
«Ҳа, бу ҳақиқат, — дейилади ресторан 7 февраль куни Facebook’даги саҳифасида эълон қилган хабарда. — Бизнинг севимли Хонлигимиз биноси ёниб кетди. ҲЕЧ КИМ ЖАБРЛАНМАДИ ва бу энг асосийси! ‘Манас’ нафақат бир бино, балки бу кулфат сабаб жамланган жамоа, оила ҳамдир. Бинони қайта қуриш жуда осон! Тез орада очилиш ҳақида эълон қиламиз!».
Ёнғин сабаб ресторан жамоасига ҳамдардлик билдирганлар ҳам, бу муассасани «ахлоқи бузуқлар макони бўлса керак» деган гумон билан ёнғинни адолатли деб топганлар ҳам топилди. «Манас» маъмурияти эса биринчи галда шу вақтгача «содиқлик бонуслари»ни тўплаган доимий хўрандаларини овутишга уринди: «Бонусларингиздан бошқа ресторанларда фойдаланишингиз мумкин».
Ёнғиннинг эртасига эса ресторан маъмурияти Facebook фойдаланувчиларини камида «ўз оптимизми» билан ҳайратда қолдирди. Ресторан юз берган бахтсиз ҳодисани «Ўз хонлигингни қур!», деб номланган «реалити-шоу»нинг бир қисмига айлантирди. Янги ресторан қурилиши ҳақида эса ҳажвга тўла видеоролик тайёрлади. Унда бошловчи ёнғинни «реалити-шоунинг биринчи куни» деб атайди ва «бу шоуни ‘Ёшлар’ телеканали намойиш этмайди», деб шукрона келтиради.
11 февраль куни «Манас» иккинчи видеороликни эълон қилди. Унда бошловчи қурилиш жараёни қандай кетаётгани, унда кимлар иштирок этаётгани ҳақида маълумот беришга уринади. Шунингдек, бу видеороликда Murad Buildings қурилиш компанияси ўз раҳбари Мурод Назаров билан бирга суратга тушган. Компания, «Манас» маъмурияти айтганидек, қурилишга «бебаҳо ҳисса» қўшган.
«Манас»нинг оғир кулфатдан кейинги бу кўтаринки видеолари фойдаланувчиларни ҳайрон қолдиргани бор гап. Айни вақтда, бу видеолар эълон қилинганидан сўнг, баъзи фойдаланувчилар ёнғин атайлаб уюштирилган деган хаёлга ҳам борган. «Гўё ўзларини пиар қилиш учун атайлаб ёнғин уюштиргандек! Баракалла, маркетологлар!», — деб ёзган бир фойдаланувчи. «Ажойиб пиар-юриш ва бошқа фирмаларни реклама қилиш учун яхши бир канал бўлибди. Янги серияларини кутаман», — деб иккинчи видеога изоҳ қолдирган бошқа бир фойдаланувчи.
«Манас» раҳбарияти бу каби ярим ҳазил, ярим чин комментларга яна кўтаринки кайфиятда риторик савол билан жавоб қайтарган: «Ҳар куни одамлар билан тўла бўлган ва бизга моддий фойда келтириб турган ресторанни қасддан ёқиб юборишимиз мумкин, деб ўйлайсизми?». Ва бошқа бир комментда қўшимча қилган: «Кўмагингиз учун катта раҳмат! Бизга ҳозир у жуда ҳам керак».
Одамлар эса ҳақиқатан ҳам ресторанга ёрдам бермоқда. Бир фойдаланувчининг ёзишича, у янги қурилаётган рестораннинг битта ғиштини 100 минг сўмга сотиб олишга қарор қилган. Ресторанда қурилишга ёрдам берган кишиларнинг исмлари «Дўстлик девори»га ёзиб қўйилиши айтилмоқда. Шунингдек, ресторан маъмурияти кўрсатилган ёрдамни депозит шаклида қайтаришни ҳам ваъда қилмоқда.
Ёнғиндан ресторан қанча зарар кўргани маълум эмас. Янги муассасанинг қурилиши қачон якунига етиши ҳам ҳозирча билдирилмаган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)