Jahon bo‘ylab bir yilda bir necha marotaba o‘tkaziladigan avtomobil auksionlarida noyob va juda qimmat avtomobillar savdoga qo‘yiladi. Dunyoda shunday avtomobillar borki, ular nafaqat noyob balki o‘ziga xosligi bilan ham ajralib turadi. Masalan, bunday o‘ziga xoslar qatoriga kamyob mashinalarni kiritish mumkin. “Motor” nashri esa dunyodagi kam nusxadagi eng qimmat avtomobillarning 6 talik reytingini taqdim qildi.
Rolls-Royce 15 hp: 35 million dollar
Bu dunyodagi eng qimmat va kamyob avtomobillardan biri. Rolls-Royce 15 hp – Charlz Rolls va Genri Roys tomonidan Manchesterda 1904-yilda yig‘ilgan birinchi model hisoblanadi. Hammasi bo‘lib oltita shunday mashina yig‘ilgan. Ma’lum bo‘lishicha, bugungi kungacha ulardan bittasi saqlanib qolgan. Mashinaga uch silindrli 15 ot kuchiga ega dvigatel o‘rnatilgan va eng yuqori tezligi 63 km/soat bo‘lgan. Avtomobil ba’zan muzey va avtosalonlarda namoyish qilinadi. Avtomobil sug‘urta kompaniyalari tomonidan 35 million dollar miqdorida baholangan.
Leyat Helica: 20 million dollar
Fransuz mashinasozi Marsel Leyya tomonidan XX asrning boshida yaratilgan propellerli avtomobilni bugun ham uchratish mumkin. Avtomobilning jami 30 ta nusxasi yaratilgan. Saqlanib qolgan nusxalarning barchasi xususiy kolleksiyalarda va savdoga kamdan-kam qo‘yiladi. Uning narxi 20 million dollar miqdorida baholangan.
Ferrari 250 GTO: 52 million dollar
Dunyodagi eng qimmat sanaladigan bu avtomobil 52 million dollar turadi. Biroq u dunyodagi eng kamyob avtomobil emas. Qiziqarli tomoni shundaki, kolleksioner avtomobilni uning avvalgi egasidan xususiy tartibda sotib olgan. Narxi jihatidan dunyoda ikkinchi o‘rinda turadigan avtomobil ham Ferrari 250 GTO. Kimoshdi savdolarning birida mashina 38 million 115 ming dollarga sotilgan. Bu ishlab chiqarilgan 39 ta avtomobilning hisob bo‘yicha 19-sidir. Mashinaning sobiq egalari Formula-1 ishtirokchilari Jo Shlesser va Ernesto Prino, shuningdek olimpiada chempioni Anri Orilye bo‘lgan.
Aston Martin Bulldog: 1,3 million dollar
Ushbu noodatiy avtomobil yagona nusxada ishlab chiqarilgan. 1979-yilda yig‘ilgan avtomobilning uzunligi 4,5 metr, balandligi esa bir metrdan sal balandroq. Avtomobilni kam nusxada ishlab chiqarish rejalashtirilgan, biroq reja amalga oshmagan.
Mashina 600 ot kuchiga ega 5,3 tvin-turbo dvigateli bilan jihozlangan. Buyuk Britaniyada yig‘ilgan avtomobilning o‘ziga xosligini “Baliqchi qush qanotli” eshiklar, elektron uskunalar paneli, orqa tomonni ko‘rsatuvchi kamera va chap tomonda joylashgan rul ko‘rsatib turadi. 1980-yilda “Bulldog”ni amerikalik kolleksioner 130 ming dollarga sotib olgan. 2011-yilda britaniyalik boyvachcha “Aston” uchun 1,3 million dollar to‘laydi.
Jaguar XKSS: 30 million dollar
Bu avtomobil “dunyodagi birinchi superkar” deb ataladi. Avtomobil 1957-yilda yaratilgan va “Le-Man” kubogining uch karra g‘olibi D-Type poygachi avtomobilining oddiy yo‘lda yuradigan varianti sifatida yaratilgan. Hammasi bo‘lib 25 ta mashinani sotuvga chiqarish rejalashtirilgan, biroq Koventridagi zavodda yuz bergan yong‘in natijasida avtomobillarning to‘qqiztasi yonib ketgan. Qolganlari esa sotilgan.
Avtomobilni sotib olgan xaridorlardan biri mashhur aktyor Stiv Makkuin bo‘lib, u Jaguar’ni besh ming dollarga sotib olgan. 2014-yilda avtomobilni sotib olgan kolleksioner mashina uchun 30 million dollar to‘lagan.
Ferrari F50 GT: 2,9 million dollar
F50 oddiy superkarining poyga varianti uch nusxada ishlab chiqarilgan. Mashina poygalarda qatnashishi kerak bo‘lgan, biroq loyiha bekor qilingan. 4,7 litr sig‘imli V12 dvigatel bilan jihozlangan, 750 ot kuchiga ega bo‘lgan uchala avtomobil ham sotilgan. 2013-yilda Ferrari F50 GT 2,9 million dollarga baholangan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)