Andijonda Damas’da yo‘lovchi tashish taqiqlangani haqidagi xabarlar rad etildi

Andijon shahrida 1-fevraldan boshlab Damas avtomashinalarida yo‘lovchi tashish butunlay taqiqlangani haqidagi xabarlar asosga ega emas. Bu haqda Andijon viloyati hokimligi axborot xizmati “Daryo”ga ma’lum qildi.

Viloyat hokimligi ma’lumotlariga ko‘ra, O‘zbekiston Prezidentining 10-yanvardagi “Aholiga transport xizmati ko‘rsatish hamda shaharlar va qishloqlarda avtobuslarda yo‘lovchilar tashish tizimini yanada takomillashtirish chora-tadbirlari to‘g‘risida”gi qaroriga muvofiq, 16-yanvar kuni viloyat hokimining shu yo‘nalishdagi qarori qabul qilingan.

Qarorga muvofiq, 2017—2021-yillarda Andijon shahriga 319 ta avtobus, 490 ta mikroavtobus (Damas emas) olib kelinadi. Bundan tashqari, 2018-yil 1-iyulgacha bo‘lgan muddatda Andijon shahrida yo‘lovchilar tashish transportida yo‘lkira uchun naqd pulsiz haq to‘lash tizimi bosqichma-bosqich joriy etilishi kutilmoqda.

Viloyat hokimligi tomonidan Damas’lar faoliyatini cheklash bo‘yicha hech qanday hujjat qabul qilinmagan. Andijon shahar Yo‘l harakati xavfsizligi xizmati hamda Avtomobil va daryo transporti agentligining hududiy bo‘limidan olingan ma’lumotlarga ko‘ra, faqat litsenziyasiz yo‘lovchi tashiyotgan, shuningdek, aslida boshqa yo‘nalish bo‘yicha tenderda g‘olib chiqib, amalda umuman boshqa yo‘nalishda harakatlanayotgan Damas haydovchilariga nisbatan odatdagidek qonuniy chora ko‘rilmoqda, xolos.

Muhammadsaid Fozilbekov, Andijon viloyati hokimligi axborot xizmati mutaxassisi

Ma’lumot uchun, O‘zbekiston Prezidentining 10-yanvardagi qaroriga muvofiq, 2017—2021-yillarda Toshkent shahridan boshqa barcha hududlar uchun 2912 ta avtobus va 5700 ta mikroavtobus sotib olinishi rejalashtirilgan.Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.