Ozodbek Nazarbekov Sergelida “dom” qurayotgani yo‘q. Lekin topshiriq bo‘lsa, “qo‘lidan kelgancha” bajarishga tayyor

O‘zbekiston xalq artisti Ozodbek Nazarbekov unga hukumat tomonidan Toshkentning Sergeli tumanida olib borilayotgan qurilish ishlarida jonbozlik ko‘rsatish bo‘yicha ko‘rsatma berilgani haqidagi gap-so‘zlarga izoh berdi. Xonanda bu haqda “Shov-shuv.uz” sayti muallifi Jasur Hamroyevga bergan intervyusida aytib o‘tdi.

Bir muddat avval Toshkentning Sergeli tumanida quriladigan yuzlab ko‘p qavatli uylardan ba’zilari Ozodbek Nazarbekov tomonidan qurilishi haqida mish-mishlar tarqalgan, bu mish-mishlar yuzasidan boshqa mashhur san’atkorlar, xususan, taniqli so‘z ustasi Obid Asomov ham fikr bildirgan edi.

Agar hukumatimiz oldimga qandaydir vazifa qo‘ysa, uni askar misoli bajarishga harakat qilaman. Chunki bu men uchun faxr, sharaf. Lekin bularning bari yolg‘on, bo‘hton, tuhmat, mish-mish, uydirma gaplardir. Bu mish-mishlardagi gaplarga yaqinroq voqea ham bo‘lmagan hatto. Lekin, yana qaytarib aytaman, topshiriq qo‘yiladigan bo‘lsa, qo‘limdan kelgancha, kuchim yetgancha Vatanga xizmat qilish — men uchun sharaf.

Ozodbek Nazarbekov, O‘zbekiston xalq artisti

Shahrisabzda eski karvonsaroyni, hozirgi zamon tili bilan aytganda — mehmonxonani qayta ta’mirlab, anjomlar bilan ta’minlab, Maqom markaziga aylantirdik. Bu asosan sayyohlar uchun xizmat qiladigan, faqat jonli ijrodagi kuy-qo‘shiqdan iborat bo‘lmay, balki restoran sifatida faoliyat ko‘rsatadigan bir muassasadir. Oqsaroy majmuasidagi qurilish ishlariga hissa qo‘shganim — men uchun katta sharaf, o‘zim uchun tarixiy voqea.

Balki mana shu ishga qo‘l urgan, Shahrisabzdagi qurilishlarda qatnashganim, kim bilsin, uzun-quloq gaplar bilan boshqacha ma’noda talqin etilib, Sergeliga “o‘tib”, mana shunday uydirma gaplarga sabab bo‘lgandir.

Ozodbek Nazarbekov, O‘zbekiston xalq artisti

Keyinroq Nazarbekov bu mish-mishlarni rad etib, apreldagi konsert kunlarini shaxsan o‘zi hamkasbi, O‘zbekiston xalq artisti Yulduz Usmonovaga taklif qilganini bildirgan edi.